बाँके(राप्ती सोनारी) : राप्ती सोनारी गाउँपालिकालाई २०८३ कात्तिक मसान्तभित्र ‘पोषणमैत्री स्थानीय शासनको नीतिगत, प्रक्रियागत कार्य कार्यान्वयनका लागि अवलम्बन तथा घोषणा प्रक्रिया अगाडी बढाउन सामुहिक हस्ताक्षर गरी प्रतिवद्धता गरिएको छ । गाउँपालिकाको सबै वडासहित सिंगो गाउँपालिकालाई २०८३ कात्तिक मसान्तभित्र पूर्णरुपले संकल्प गरी सहयोग गर्न/गराउन शनिबार सामुहिक हस्ताक्षर गरी प्रतिवद्धता गरिएको हो ।
गाउँपालिका कार्यालय अगैयामा शनिबार आयोजित एक औपचारिक कार्यक्रममा जनप्रतिनिधि, राजनीतिक दल, बालबालिका प्रतिनिधि, सेवा प्रदायक, विभिन्न संघ संस्था, बिद्यालय, खानेपानी समिति, विषयगत शाखा लगायत विभिन्न मुख्य सरोकारवालाले सामुहिक प्रतिवद्धता ब्यक्त गरे ।
गाउँपालिकाका स्वास्थ्य शाखा प्रमुख देबेन्द्र केसीका अनुसार पोषणमैत्री स्थानीय शासन नीतिगत प्रकृयागत कार्य कार्यान्वयनका लागि अवलम्बन तथा घोषणा प्रक्रिया सम्बन्धमा सोनारी गाउँपालिकाको तर्फबाट सामुहिक प्रतिवद्धता ब्यक्त गरिएको हो । घोषणाका लागि सामुहिक रुपमा थालिएको यो प्रयास उक्त गाउँपालिका बाँकेकै पहिलो स्थानीय तह भएको शाखा प्रमुख केसीले बताए ।
संविधानको भाग ३ मौलिक हक, धारा ३९, धारा ३५, स्थानीय सरकार सञ्चालन ऐन २०७४ परिच्छेद ३, बालबालिका सम्बन्धी ऐन २०७५, पोषणमैत्री स्थानीय शासन कार्यान्वयन कार्यविधि २०८० तथा पोषण सम्बन्धी विभिन्न नीति, निर्देशिका, कार्यविधि बमोजिम उक्त गाउँपालिकामा पोषणमैत्री स्थानीय शासन राष्ट्रिय अभियान(एनएफएलजी) नीतिगत प्रक्रियागत कार्यान्वयनका लागि अवलम्बन, कार्यान्वयन तथा घोषणाको प्रक्रियामा आ-आफ्नो क्षेत्रबाट सक्रिय एवम् अर्थपूर्ण सहभागिता जनाएर प्रतिबद्धता ब्यक्त गरिएको थियो ।
राप्ती सोनारी गाउँपालिका अध्यक्ष तप्तबहादुर पौडेलले उद्घाटन गरेको उक्त कार्यक्रममा उपाध्यक्ष मनिषासिंह थारुले स्वागत गरेकी थिइन् । कार्यक्रममा संघिय मामिला तथा सामान्य प्रशासन मन्त्रालयका पोषणमैत्री स्थानीय शासनका शाखा प्रमुख (उपसचिव) रेशमलाल कँडेलले पोषणमा लगानीको आवश्यकता बारेमा र राष्ट्रिय स्तरका पोषण विज्ञ एवम् सहजकर्ता विणुप्रसाद चौवेले नीति, योजना, प्रक्रिया लगायत विषयमा सहजीकरण गरेका थिए ।
गाउँपालिकाका विभिन्न वडाका वडाअध्यक्षहरु, कार्यपालिका सदस्यहरु, निमित्त प्रमुख प्रशासकीय अधिकृत राजेश बोहरा लगायत उपस्थित भएको उक्त कार्यक्रममा प्रवक्ता एवम् वडा नम्बर ४ का वडाअध्यक्ष मिनराज खड्का ‘सन्तोष’ ले ‘पोषणमैत्री स्थानीय शासनयुक्त गाउँपालिका घोषणा’लाई प्रभावकारी रुपले कार्यान्वयन गरिने प्रतिवद्धता जनाए ।
