नेपालगन्ज : पश्चिम नेपालका रेफरल केन्द्रका रुपमा रहेको भेरी अस्पतालले आफ्नो वार्षिक उत्सव भब्य रुपमा मनाएको छ । उक्त अस्पताल सन् १९४७ साउन १२ गते स्थापना भएको थियो । अस्पतालले विविध कार्यक्रम गरेर सोमबार वर्षिक उत्सव मनाएको हो ।
अस्पताल विकास समितिका अध्यक्ष बीरेन्द्रबहादुर शाहको सभापतित्वमा भएको वार्षिक समारोहलाई सम्बोधन गर्दै प्रमुख अतिथी एवम् प्रतिनिधि सभा सांसद किशोरसिंह राठौरले नेपालगन्ज स्वास्थ्यको हब रहेको बताए । भेरी अस्पतालको इतिहास निकै पुरानो भएपनि यसको विकास जुन रुपमा हुनुपर्ने हो, त्यसरी हुन नसकेको बताए । नेपालगन्जलाई स्वास्थ्यको हब बनाउन आफु लाग्ने सांसद राठौंरले प्रतिवद्धता जनाए ।
उक्त कार्यक्रममा प्रमुख मेडिकल सुपरिटेन्डेण्ट डा. निराजन सुवेदीले अस्पतालको कार्यप्रगति तथा आगामी योजनाबारे प्रस्तुतीकरण गरेका थिए । अस्पतालका प्रमुख नर्सिङ प्रशासक आशा पन्तले स्वागत गरेको उक्त कार्यक्रम सञ्चालन विकास समितिका सदस्य डा. डक्टप्रसाद धितालले गरेका थिए ।
वार्षिक उत्सव कार्यक्रममा कार्यक्रममा नेपाली काँग्रेस बाँकेका सभापति नारायण प्रसाद गौडेल, एमाले बाँकेका अध्यक्ष निरक गुरुङ, लुम्बिनी प्रदेशका सांसद माया पुन, मिना सिद्दिकी, अस्पतालका विभिन्न विभागका प्रमुख, कर्मचारीहरु, सेवा निवृत्त मेसुहरु, सञ्चारकर्मी लगायतको उपस्थिती रहेको थियो ।
उक्त अवसरमा सेवा निवृत्त भएका अस्पतालका पूर्वमेसुहरु डा. मोहिउद्दिन किदवाई, डा. श्याम सुन्दर यादव, डा. बिनोद खेतान, डा. पिताम्बर सुवेदी, डा. रुपानन्द अधिकारी र डा. बीरेन्द्रबहादुर चन्दलाई सम्मान गरिएको थियो । कार्यक्रमका प्रमुख अतिथी एवम् प्रतिनिधी सभाका सांसद राठौंर, अस्पताल विकास समितिका अध्यक्ष शाह लगायतले सम्मान गरेका थिए ।
यस्तै अस्पतालमा २५ वर्ष सेवा अवधि पूरा गरेका कर्मचारी, विभिन्न विधामा उत्कृष्ट भएका कर्मचारीलाई पनि सम्मान गरिएको थियो कार्यक्रममा अस्पतालका कर्मचारीहरुले विभिन्न नृत्य, गीत तथा आफ्ना रचनाहरु प्रस्तुत गरेका थिए । सोही समारोहमा भेरी अस्पतालले वार्षिक रुपमा प्रकाशन गर्दै आएको स्मारिका विमोचन पनि गरिएको थियो ।
