नेपालगन्ज : महिला उद्यमी महासंघ नेपालका केन्द्रीय अध्यक्ष शोभा ज्ञवालीले महिला उद्यम क्षेत्रको विकास गर्न राज्यले नीतिगत कुरामा सुधार गर्न आवश्यक रहेको बताएकी छन् । महिला उद्यमी संघ नेपाल बाँकेको २२ औं वार्षिक साधारण सभा एवम् ११ औं अधिवेशनलाई बुधबार नेपालगन्जमा सम्बोधन गर्दै उनले भनिन्, ‘महिला उद्यमीलाई कसरी अगाडी बढाउने भनेर हामीले केन्द्रमा बसेर नीतिगत काम गर्छौ, महिला उद्यमीको क्षमता बृद्धि, नेतृत्व विकास र आर्थिक विकासमा पनि काम गरिरहेका छौं,’ उनले भनिन् । महिला उद्यमीहरुमा सशक्तीकरण गर्न आफुहरुले जोड दिईरहेको अध्यक्ष ज्ञवालीको भनाई छ ।
महिला उद्यमी महासंघ अहिले राष्ट्रिय चिनारीको रुपमा उभिएको भन्दै महासंघलाई जन्माउने जिल्ला नै बाँके भएको बताइन् । ‘बाँके जिल्लाबाट जन्मेको महिला उद्यमीहरुको यो संस्था केन्द्रसम्म पुगेको छ, यसमा बाँकेका महिला उद्यमी दिदी बहिनीहरुको ठुलो योगदान रहेको छ,’ उनले भनिन् ।
स्वदेशमै उद्यम गरेर स्वदेशमै रोजगारी सिर्जना गर्न युवा लक्षित कार्यक्रमलाई महासंघले जोड दिइरहेको अध्यक्ष ज्ञवालीले जानकारी दिइन् । आफ्नै देशमा उत्पादन गरेका सामानबाट आफ्नै देशमा रोजगारी दिनका लागि ३ प्रतिशत ब्याजमा ५ वर्षका लागि २५ लाख रुपैयाँ सहुलियत ऋण उपलब्ध गराउन नीतिगत रुपमा पहल गरेको उनले बताइन् । महिला उद्यमी संघले बाँकेमा कोसेली घर सञ्चालन गरेकोमा प्रशंसा गर्दै नेपाली महिला उद्यमीले उत्पादन गरेका बस्तु अष्टे«लियासहित विभिन्न देशमा निर्यात भइरहेको जानकारी दिइन् ।
संघ बाँकेका अध्यक्ष सावित्रा बस्नेतको सभापतित्व एवम् नेपालगन्ज उपमहानगरपालिकाका नगर प्रमुख प्रशान्त विष्टको प्रमुख आतिथ्यतामा भएको अधिवेशन उद्घाटन शत्रमा महासंघका केन्द्रीय सदस्य एवम् लुम्बिनी प्रदेश अध्यक्ष सरस्वती शर्मा पराजुली, महासंघका केन्द्रीय सदस्य एवम् कर्णाली प्रदेश अध्यक्ष शिला नेपाली, लायन्स क्लबका डिष्ट्रिक गर्भनर ज्ञानेन्द्र श्रेष्ठ, पत्रकार महासंघ बाँकेका अध्यक्ष नवीन गिरी, नेपालगन्ज भन्सार कार्यालयका प्रमुख जनार्दन पौडेल लगायतले बोलेका थिए ।
अधिवेशन उद्घाटन शत्रमा विभिन्न क्षेत्रबाट संघप्रति योगदान पुर्याए वापत नेपालगन्ज उपमहानगरपालिकाका नगर प्रमुख प्रशान्त बिष्ट, महिला उद्यमी महासंघ नेपालका केन्द्रीय अध्यक्ष शोभा ज्ञवाली, संघ बाँकेका पुर्वअध्यक्ष एवम् महासंघका केन्द्रीय सदस्य सरस्वती शर्मा पराजुली, महासंघका केन्द्रीय सदस्य एवम् कर्णाली प्रदेश अध्यक्ष शिला नेपाली, केएल दुगड गु्रपका प्रबन्ध निर्देशक प्रदिप छाजेड, संघका सल्लाहकारद्धय हरि सुवेदी र कमल खत्री र कार्यालयका ब्यवस्थापक मिना चौधरीलाई सम्मान गरिएको थियो ।
