नेपालगन्ज : क्यान्सर रोग सम्बन्धी गोष्ठी तथा चिकित्सककीय सम्मेलन नेपालगन्जमा हुने भएको छ । देशका विभिन्न अस्पतालमा कार्यरत क्यान्सर रोग विशेषज्ञ चिकित्सकहरु बीच क्यान्सरका विभिन्न प्रकृतिका बारे अन्तरक्रिया सहित चिकित्सकिय सम्मेलन हुन लागेको हो ।
सम्मेलनमा पश्चिम नेपालमै पहिलो पटक क्यान्सर रोगबारे चिकित्सकहरु बीच अन्तरक्रिया हुनेछ । नेपालगन्जमा सम्मेलनको तयारीबारे आयोजित पत्रकार सम्मेलनमा बाँके र बाँके आसपासका जिल्लामा रहेका चिकित्सकहरु (सर्जन, प्याथोलोजिष्ट, अर्थोपेडिक, रेडियोलोजिष्ट, मेडिकल अंकोलोजिष्ट तथा रेडियसन अंकोलोजिष्ट)लाई सुशिल कोइराला प्रखर क्यान्सर अस्पतालले प्रदान गर्ने सेवाका बारेमा जानकारी प्रदान गर्नुका साथै विश्व स्तरमा (हड्डी, मांसपेशी तथा छाला सम्बन्धी क्यान्सर)को नयाँ प्रविधी र अभ्यासका बारेमा छलफल तथा आफुले काम गर्दा भोगेका आफ्ना भोगाईहरु साटासाट गरिनेछ ।
सुशील कोइराला प्रखर क्यान्सर अस्पताल, खजुराको आयोजना र मसकुलोसकेलेटल अंकोलोजी सोसाइटी अफ नेपाल (मोसन) को सहआयोजना तथा अर्थोपेडिक एशोसियसन (नोए) वेष्टर्न च्याप्टरको सहकार्यमा मंसिर २६ र २७ गते हड्डी, मांसपेसी तथा छाला सम्बन्धी क्यान्सरको बृहत गोष्ठी तथा चिकित्सकिय सम्मेलन हुने भएको हो ।
क्यान्सर अस्पताल खजुरामा सम्मेलनको उद्घाटन सत्र गर्ने र नेपालगन्जमा गोष्ठी तथा सम्मेलन आयोजना हुने गरि तयारी गरिएको आयोजकले जनाएको छ । उक्त सम्मेलनमा विषयगत विज्ञहरुले कार्यपत्र प्रस्तुत गर्ने कार्यक्रम रहेको आयोजक समितिका संयोजक एमएसके अनकोसर्जन डा. गोपाल पौडेलले जानकारी दिएका छन् ।
सम्मेलनमा बाँके र आसपासका जिल्लाका सर्जन, प्याथोलोजिष्ट अर्थोपेडिक्स, रेडियोलोजिष्ट, मेडिकल अंकोलोजिष्ट तथा रेडियसन अंकोलोजिष्टलाई खजुरा क्यान्सर अस्पतालको सेवाकाबारेमा जानकारी दिइने उनले बताए । सम्मेलनमा भरतपुर, विराटनगर, काठमाडौं, दाङ, सुर्खेत, कोहलपुर र नेपालगन्जमा कार्यरत क्यान्सरसम्बन्धी चिकित्सकको सहभागिता रहनेछ ।
पत्रकार सम्मेलनमा सुशिल कोइराला प्रखर क्यान्सर अस्पतालका क्लिनिकल अंकोलोजिष्ट एवं अयोजक समितिका सचिव डा. मुकेश यादवले पश्चिम नेपालमै पहिलो पटक हुन थालेको यो सम्मेलनले अस्पतालको प्रचार प्रसार र सेवाका बारेमा जानकारी दिने तथा चिकित्सकले खजुरामा बिरामी रिफर गर्ने आशा गरिएको बताए ।
