नेपालगन्ज : धितोपत्र बोर्डको ब्रोकर कार्यालयको संख्या नेपालगन्जमा तीन पुगेको छ । पछिल्लो समय प्राईमो सेक्युरिटिज प्रा.लि.ले पनि नेपालगन्जमा आफ्नो शेयर बजार सम्वन्धी कारोबार सुरु गरेपछि धितोपत्र बोर्डको ब्रोकर कार्यालयको संख्या तीन पुगेको हो ।
सो सेक्युरिटिज प्रा.लि.ले नेपालगन्ज क्षेत्रका लगानीकर्तासँग साक्षात्कार गर्दै शेयर बजारको अवस्था र आफ्ना सेवा बारे जानकारी दिएको छ । सो अवसरमा सेक्युरिटिज प्रा.लि.का संस्थापक सञ्चालक विजय बहादुर शाहले नेपालगन्ज आर्थिक क्षेत्रका हिसावले चलायमान शहर भएकाले यस क्षेत्रमा शेयर बजारको सम्भावना रहेको बताए । शेयर बजारका सम्भावना र चुनौतीबारे जानकारी दिदै बाँके र बर्दियाका लगानीकर्ता यसबाट लाभावन्वित हुने उनले विश्वास व्यक्त गरे ।
कम्पनीका प्रमुख कार्यकारी अधिकृत मेघनाथ उपाध्यायले ब्रोकर कार्यालयबाट हुने सेवा प्रवाहलाई प्रभावकारी बनाउने विषयमा धारणा राख्दै लगानीकर्ताले राखेका जिज्ञासाको जवाफ दिएका थिए । शेयर बजारका लगानीकर्ता अर्जुन सुवेदी, विकास भट्टराई, पुष्प प्रधान, जीवनारायण वेल्बासे लगायतले वित्तीय साक्षरता जस्ता कक्षा सञ्चालन गर्न आग्रह गरे ।
२०५० साल माघ १ गतेदेखि शेयर बजार सम्बन्धी कारोवार गरेको सो कम्पनीले तेस्रो शाखाका रुपमा यो कार्यालय स्थापना गरेको हो । यसअघि नेपालगन्जमा इम्पेरियल सेक्युरिटिज प्रा.लि. र कालिका सेक्युरिटिज प्रा.लि.ले धितोपत्र बोर्डको ब्रोकर कार्यालय स्थापना गरेर शेयर बजार सम्बन्धी कारोबार गर्दै आएका छन् ।
नेपालगन्जमा स्थापना भएका ब्रोकर कार्यालयमा बाँकेसहित दाङ, सल्यान, बर्दिया, सुर्खेत लगायतका जिल्लाबाट शेयर कारोबारका लागि लगानीकर्ता आउने गर्छन् । नेपालगन्जको शेयर बजारमा लगानीकताले १ करोड देखि ५ करोड रुपैयाँसम्म दैनिक रुपमा लगानी गर्दै आएको बताइन्छ ।
