नेपालगन्ज : अंग्रेजी नयाँ वर्ष २०२६ को अवसरमा सिद्धार्थ कटेज नेपालगन्जले चौथो पटक ‘मःमः फेस्टिवल’ आयोजना गर्ने भएको छ ।
सिद्धार्थ कटेजले सन् २०८० सालदेखि निरन्तर रूपमा नेपालगन्जमा मःमः फेस्टिवल आयोजना गर्दै आएको छ । तीन दिनसम्म सञ्चालन हुने मःमः फेस्टिवलमा प्रत्येक दिन फरक-फरक कलाकारको विशेष प्रस्तुति रहनेछ ।
फेस्टिवलको पहिलो दिन स्थानीय कलाकार तथा ब्याण्डहरूको प्रस्तुति हुनेछ, भने दोस्रो दिन चर्चित गायक खुमन अधिकारी, इब्सल सञ्ज्याल लगायत कलाकार तथा ब्याण्डहरूको बेजोड प्रस्तुती रहने सिद्धार्थ विजनेश ग्रुप अफ हस्पिटालिटीका पश्चिम क्षेत्रीय कार्यकारी प्रमुख केशव न्यौपानेले जानकारी दिए ।
उनका अनुसार सोही दिन सांस्कृतिक कार्यक्रमसँगै मःमः मेकिङ एण्ड कुकिङ प्रतियोगिता पनि आयोजना गरिनेछ, जसका लागि निःशुल्क नाम दर्ता गर्न सकिने व्यवस्था गरिएको होटेल सिद्वार्थ नेपालगन्जका बद्री कोइरालाले बताए ।
फेस्टिवलको अन्तिम दिन राष्ट्रिय तथा स्थानीय ब्याण्डहरूको प्रस्तुति रहने आयोजकले जनाएको छ। साथै, तीनै दिन राष्ट्रिय तथा स्थानीय कलाकारहरूको नृत्य प्रस्तुति पनि निरन्तर रहनेछ । नेपालगन्ज शहरको मुटुमा अवस्थित सिद्धार्थ कलेज नेपालगन्ज पर्याप्त स्पेस भएको लोकप्रिय रेष्टुरेन्ट हो ।
सिद्धार्थ ग्रुपअन्तर्गत नेपालगन्जमा रहेको होटल सिद्धार्थ (चारतारे लक्जरी होटल) सहित देशका विभिन्न स्थानमा होटल, रिसोर्ट, रेष्टुरेन्ट तथा क्याफे गरी ३३ वटा आउटलेट सञ्चालनमा रहेका छन् ।
सिद्दार्थ ग्रुपका हेड अफ सेफ एलबी कौशलले चौथो मःमः फेस्टिवलमा २ सय भन्दा बढी प्रकारका मःमः समावेश गरिनेछ। स्थानीय समुदायमा लोकप्रिय रहेका विभिन्न खाद्य परिकारहरूको प्रवर्द्धन गर्ने उद्देश्यका साथ फेस्टिवल आयोजना गर्न लागिएको आयोजकले जनाएको छ।
