काठमाडौं : श्रम, रोजगार तथा सामाजिक सुरक्षा मन्त्री दिपक साहले वैदेशिक रोजगारीसम्बन्धी गुनासा व्यवस्थापन चुनौतीपूर्ण रहेको भन्दै समाधानका लागि सरकारबीच समन्वय आवश्यक रहेको बताएका छन् ।
मन्त्रालयले बुधबार अहिलेसम्म गरेका निर्णयबारे छलफल गर्ने कार्यक्रममा बोल्दै मन्त्री साहले वैदेशिक रोजगारीसम्बन्धी गुनासा र ठगीका घटनाहरू मन्त्रालयका लागि सबैभन्दा ठूलो चुनौती रहेको बताएका हुन् । ‘समाधान योजनाअन्तर्गत सबैभन्दा ठूलो समस्या वैदेशिक रोजगारीसम्बन्धी गुनासाहरू हुन् । ठगीका घटना धेरै छन् र यसको व्यवस्थापन अत्यन्त चुनौतीपूर्ण छ। यस विषयमा मैले विभागसँग पटक–पटक छलफल गरिसकेको छु,' शाहले भने ।
उनले यस विषयमा प्रधानमन्त्री बालेन शाहसँग पनि निरन्तर छलफल भइरहेको जानकारी दिए । ‘हामी प्रधानमन्त्रीसँग छलफल गरिरहेको छौँ, हामी कुन दिशामा जाने भन्ने विषयमा छलफल गरिरहेका छौं, त्यसअनुसार प्रधानमन्त्री र मेरो बीचमा तादम्यता मिल्नु आवश्यक छ, हामी समाधान कसरी गर्न सकिन्छ भन्नेमा केन्द्रित छौं,’ शाहले थपे ।
मन्त्री साहले मन्त्रालयमा रहेका फाइल र केसहरूको अवस्थाबारे स्पष्टता अभाव रहेको पनि स्वीकार गरे। ‘धेरै फाइलहरू जलेका छन् भन्ने सुनेको छु। कसैले ४० हजार केस भन्छन्, कसैले ५० हजार, कसैले १८ हजार। यहाँ धेरै कुरामा कन्फ्युजन छ,’ उनले भने ।
आफू मन्त्री भएर आएपछि यस्ता विषय लुकाउन नचाहेको बताउँदै थप भने, ‘मन्त्री भए पनि म यथार्थ लुकाउन चाहन्नँ। अहिले ती केसहरूको वास्तविक अवस्था बुझ्ने क्रममा छु। हामी स्पष्ट छौं कि ती केसहरू कसरी घटाउन सकिन्छ भन्नेमा काम गर्नुपर्छ।’
