नेपालगन्ज : होटल पौवा प्रा.लि.ले आफ्नो गौरवमय १० वर्ष पूरा गरेको छ । पौवाले १० वर्षअघि चैत २५ गतेका दिन स्वदेशी लगानी, सामूहिक स्वामित्व र नेपाली आतिथ्य सँस्कृतिलाई आधार बनाएर नेपाली हस्पिटालिटीको घोषणा गर्दै आफ्नो सेवा आरम्भ गरेको थियो । नेपाली स्वाद, नेपाली आतिथ्य र नेपाली परिकारलाई देश विदेशमा ब्राण्डीङ गर्ने लक्ष्य लिएर सेवा दिँदै आएको पौवाले १० औँ वार्षिक उत्सवको अवसरमा देशभर रहेका सम्पूर्ण शाखाहरूमा स्वाद उत्सव कार्यक्रम आयोजना गर्न लागेको मंगलबार नेपालगन्जमा पत्रकार सम्मेलन गरेर जानकारी दिएको छ ।
होटल पौवा प्रा.लि.का अध्यक्ष दुर्गा भण्डारीले विगत १० वर्षदेखी दिदै आएको सेवाबारे जानकारी गराएका हुन् । यही चैत्र २६, २७ र २८ गते (तीन दिन) सम्म सञ्चालन हुने उक्त उत्सवमा होटल पौवाका सबै शाखामा विशेष अतिथि सत्कारसहित नेपाली रैथाने स्वाद लिएर ग्राहकहरूलाई छुट्टै अनुभव र आनन्द प्रदान गर्ने कार्यक्रम राखिएको होटल पौवाका ब्राण्डिङ विभाग प्रमुख विष्णुप्रसाद भण्डारीले जानकारी दिए ।
कार्यक्रममा सहभागी हुन देशभरका शाखाहरूबाट ४० हजारभन्दा बढी निमन्त्रणापत्र वितरण गरिएको भण्डारीले बताए । ‘पौवाको उत्कृष्ट आतिथ्यलाई स्वीकार गर्दै आमन्त्रित सबै महानुभावहरू उत्सवमा सहभागी हुनुहुने हाम्रो अपेक्षा छ,’ उनले भने । रुपन्देहीको सालझण्डीस्थित सानो घरको सात कोठाबाट प्रारम्भ भएको चेन होटलको सेवा भैरहवाबाट होटल पौवाको नामले देशका विभिन्न क्षेत्रमा विस्तार हुँदै गएको छ ।
छोटो अवधिमै नेपाली आतिथ्य क्षेत्रमा आफ्नो छुट्टै पहिचान स्थापित गर्दै हाल देशका विभिन्न स्थानमा २० वटा शाखा मार्फत पौवाले सेवा प्रदान गर्दै आएको छ । ‘जहाँबाट नेपाली आतिथ्यको सुरुवात हुन्छ’ भन्ने मूल नाराका साथ अघि बढिरहेको पौवाले नेपाली भाषा, सँस्कृति तथा रैथाने खानाको संरक्षण र प्रवद्र्धनमा विशेष जोड दिँदै आएको छ ।
वार्षिक उत्सवकै अवसरमा कम्पनीले आफ्ना लगानीकर्ता तथा सहयात्रीहरूसँग भावी रणनीति र विस्तार योजनाबारे छलफल गर्ने उद्देश्यले ‘बितायौं बालापन’ अवधारणामा चैत्र २८ गते भैरहवा शाखामा लगानी सम्मेलन समेत आयोजना गर्ने जनाएको छ । एक दशकसम्म प्राप्त अभूतपूर्व विश्वासका आधारमा शताब्दी चुम्ने लक्ष्य ‘मिसन १००’ लाई सफल बनाउन सो लगानी सम्मेलन आयोजना गरिएको हो ।
‘मिसन १००’ संख्यात्मक लक्ष्य मात्र नभएर व्यवस्थापन क्षमता, ब्राण्ड विश्वसनीयता र संस्थागत परिपक्वताको परीक्षण भएको ब्राण्डिङ विभाग प्रमुख भण्डारीले बताए । ‘मिसन १००’ अन्तर्गत गुणस्तर, प्रणाली, प्रविधि, मानव संसाधन विकास र नेपाली हस्पिटालिटी ब्राण्डलाई अन्तर्राष्ट्रिय मापदण्ड सहितको स्तरमा उक्लिने दिशामा अघि बढ्ने योजना रहेको पौवाले जनाएको छ ।
होटल पौवा सञ्जालमा हाल झण्डै १ हजार भन्दा बढी कर्मचारी कार्यरत छन्, भने २ सय ५० भन्दा बढी लगानीकर्ताको सहभागिता रहेको कम्पनीले जनाएको छ । कम्पनीले आगामी दिनमा देशका विभिन्न स्थानमा थप शाखा विस्तार गर्दै नेपाली आतिथ्यलाई अझ व्यापक रूपमा प्रवद्र्धन गर्ने योजना अघि बढाएको छ ।
नेपाली कला सँस्कृति र परम्परालाई विविध कार्यक्रमहरु मार्फत प्रवद्र्धन गर्दै आएको होटल पौवाले नेपाली नयाँ वर्ष २०८३ को स्वागत पनि विशेष कार्यक्रम सहित गर्ने तयारी गरेको होटल पौवा, नेपालगन्जमा महा प्रबन्धक गिरीराज पाण्डेले जानकारी दिए । नयाँवर्षको स्वागतमा चैत ३० गतेको साँझ पौवा नेपालगन्ज शाखामा स्थानीय तथा ख्यातिप्राप्त राष्ट्रिय कलाकारबाट सांगितिक कार्यक्रम सहित ‘शुभकामना साँझ-२०८३’ आयोजना हुने पाण्डेले बताए ।
यही चैत ३० गते साँझ नेपालगन्जमा हुने ‘शुभकामना साँझ-२०८३’ मा ख्यातीप्राप्त आधुनिक गायक कमल खत्री र गायीका समिक्षा अधिकारीको प्रस्तुती रहने उनले बताए । ‘चर्चित प्रस्तोता समिरमान श्रेष्ठको उदघोषणमा सञ्चालन हुने कार्यक्रममा स्थानीय मोहिनी डान्स ग्रुपको साँगितिक प्रस्तुती रहनेछ भने गायक प्रिन्स ठकुरीको समेत प्रस्तुती रहनेछ,’ उनले भने ।
पौवाले नेपाली मौलिक परम्परामा आधारित विभिन्न जाति, जनजातिका चार्डपर्वमा विशेष कार्यक्रम गर्दै नेपाली सँस्कृति र परम्पराको संरक्षण गर्दै आएको छ । महाप्रबन्धक पाण्डेका अनुसार दशैपछिको पूर्णीमाको सराय नाच, तिहारको देउसी भैला, माघीको खिचडी, महाशिवरात्रीमा शीव भजन जस्ता पर्वहरुमा ग्राहकहरुको उपस्थितीमा पौवाका शाखाहरुमा विशेष उत्सव हुने गरेको छ ।
कम्पनीले वार्षिक उत्सवको अवसरमा आयोजना हुने ‘स्वाद उत्सव’ कार्यक्रम तथा ‘शुभकामना साँझ-२०८३’मा सहभागी भई नेपाली स्वाद र आतिथ्यको अनुभव तथा मनोरञ्जन लिन सम्पूर्ण ग्राहक तथा सरोकारवालालाई सार्वजनिक रुपमा समेत आमन्त्रण गरेको छ ।
