बाँके (बैजनाथ) : बाँकेको बैजनाथ गाउँपालिकाले किसानलाई ७० प्रतिशत अनुदानमा कृषि यान्त्रीकरण वितरण गरेको छ । ‘किसानसँग पालिका प्रमुख कार्यक्रम’ अन्तर्गत गाउँपालिकाले ९५ जना किसानलाई बिद्युतीय ‘चारा मेशिन’ वितरण गरेको हो । गाउँपालिकाले चालु आर्थिक वर्ष २०८२/०८३ का लागि विनियोजन गरेको २० लाख रुपैयाँबाट उक्त मेशिन वितरण गरेको हो ।
गाउँपालिका कार्यालय रामपुरमा शुक्रबार अध्यक्ष प्रकाशबहादुर शाहीले किसानहरुलाई मेशिन हस्तान्तरण गरे । किसानहरुलाई चारा मेशिन हस्तान्तरण गर्दै गाउँपालिका अध्यक्ष शाहीले किसानको आवश्यकता अनुसार कृषि यान्त्रीकरण वितरणमा जोड दिइएको बताए ।
‘बैजनाथ गाउँपालिका क्षेत्रमा धेरै संख्यामा किसानहरु कृषि पेशामा आवद्ध हुनुहुन्छ, किसानलाई केही सहयोग गर्न सक्यौं भने कृषि क्रान्तिबाट आर्थिक क्रान्ति गर्न सकिन्छ, उहाँहरुको जिविकोपार्जन हुने, आय आर्जनसँग जोडिने, उत्पादन बढाउने र स्वरोजगार हुने त्यो लक्ष्यका साथ हामीले किसानसँग पालिका प्रमुख कार्यक्रम सञ्चालन गरेका हौं,’ उनले भने ।
हेर्नुस् भिडियो रिपोर्ट :
२०७९ सालदेखी लगातार चौथो वर्षसम्म आईपुग्दा किसानसँग पालिका प्रमुख कार्यक्रम अन्तर्गत कृषि यान्त्रीकरण र प्रविधिसँग किसानलाई जोड्ने काम गरिरहेको अध्यक्ष शाहीले बताए । किसानसँग पालिका प्रमुख कार्यक्रम सञ्चालन गर्न गाउँपालिकाले कार्यविधि बनाएको उल्लेख गर्दै उनले बैजनाथमा किसानले कुनै न कुनै सामान पाएको बताए ।
अनुदानमा प्राप्त गरेको सामानलाई राम्रोसँग उपयोग गर्न उनले आग्रह गरेका छन् । ‘मेशिन जसले लगेको छ, उसको घरमा मेशिन देखियोस्, तपाईलाई प्रोत्साहनका लागि हामीले मेशिन दिएको हो,’ शाहीले भने, ‘मेशिनलाई सुरक्षितका साथ घरमा राख्नुहोला, कसैलाई बेच्ने वा कसैलाई दिने काम नगर्नुहोला ।’
यस्तै उपाध्यक्ष निर्मला रोकायले किसानको हितका लागि र जिविकोपार्जनमा सहजताको लागि गाउँपालिकाले किसानसँग पालिका प्रमुख कार्यक्रम राखेको बताइन् । ‘यो कार्यक्रमले किसानलाई पक्कैपनि प्रत्यक्ष रुपमा लाभ भएको हामीले अनुभुति गरेका छौं, किसान दाजुभाई दिदी बहिनीहरुले ७० प्रतिशत अनुदानमा लिएको यान्त्रीकरणबाट धेरै लाभ लिएको अनुभुति हामीहरुले किसानहरुबाट नै पाएका छौं,’ उनले भनिन्, ‘किसानलाई आत्मनिर्भर बनाउने किसिमका कामहरु पनि जोड्दै गएका छौं र हाम्रो कार्यकालसम्म निरन्तर रुपमा राखेर किसानलाई कृषिमार्फत आर्थिक क्रान्तिमा जोडेर लैजानेछौं ।’
स्थानीय सरकारले किसानको साथमा रहेको कुराको अनुभुति गराउन ठुलो मात्राको बजेटलाई गाउँपालिकाले कृषिमा लगानी गरेको प्रष्ट्याइन् । कार्यपालिका सदस्य एवम् आर्थिक विकास समितिका संयोजक फरिदुद्धिन हलवाईले कृषि क्षेत्रलाई माथी उठाउन गाउँपालिकाले वार्षिक रुपमा करोडौं रुपैयाँ विनियोजन गरेर काम गर्दै आएको बताए । गाउँपालिकाको पशु शाखा प्रमुख बालकृष्ण चौधरीका अनुसार किसानसँग पालिका प्रमुख कार्यक्रम अन्तर्गत अनुदानमा मेशिन वितरण गर्नुअघि सार्वजनिक रुपमा सूचना जारी गरेर किसानसँग निवेदन माग गरिएको थियो ।
किसानबाट १ सय ७३ वटा निवेदन प्राप्त भएकोमा विभिन्न मापदण्ड अनुसार ९५ जना किसान छनोटमा परेको शाखा प्रमुख चौधरीले बताए । गाउँपालिकाबाट ७० प्रतिशत अनुदानमा बिद्युतीय चारा मेशिन पाएपछि किसानहरु खुसी भएका छन् ।
गाउँपालिकाले किसानका लागि अलग्गै कार्यक्रम राखेर विभिन्न अनुदान दिदै आएकोमा उनीहरु दंग छन् । गाउँपालिकाले आर्थिक वर्ष २०७९/०८० बाट किसानसँग पालिका प्रमुख कार्यक्रम सञ्चालनमा ल्याएको हो । त्यसयता हरेक वर्ष करोडौं रुपैयाँ बजेट विनियोजन गरेर गाउँपालिकाले किसानका लागि ७० प्रतिशत र शत प्रतिशत अनुदानका कार्यक्रमहरु सञ्चालन गर्दै आएको छ ।
