राजेन्द्र कुमार श्रेष्ठ
नेपालको इतिहास हेर्ने हो भने नेपालको सबै भन्दा पुरानो लोकतान्त्रिक मुल्य र मान्यतामा आधारीत विपी कोइराला, गणेशमान सिंह, सुवर्ण शमसेर, कृष्णप्रसाद भट्टराई जस्ता आर्दश पुरुषको विचार धाराबाट सु-संगठित राजनीतिक पार्टी हो नेपाली कांग्रेस । लोकतन्त्रिक हिसाबले हेर्नै हो भने अहिले भइरहेका विभिन्न राजनीतिक दलका महाधिवेशनबाट पृथक रहेको कुरा पनि स्पष्ट छ ।
स्थापना कालदेखि विभिन्न कालखण्डमा देशमा अत्यन्तै विषम परिस्थिति आउँदा देशको बागडोर समाल्ने जिम्मा पनि नेपाली कांग्रेसको रहदै आएको इतिहास छ । चाहे त्यो १०४ वर्ष लामो जहानीय राणा शासन विरुद्धको २००७ सालको प्रजातान्त्रिक आन्दोलनको अगवाइ, २०१७ सालको राजा महेन्द्रले गरेको कु विरुद्धको विद्रोह, २०३६ सालको जनमत संग्रहको नेतृत्व २०४२ सालका पञ्चायत विरुद्धको सत्याग्रहको अगुवाई २०४६ सालमा ३० वर्षे निरंकुश पञ्चायती व्यवस्थालाई जरैदेखि उखेल्ने जनआन्दोलन होस् चाहे त्यो १० वर्षे माओवादी जनयुद्धलाई विश्राम लगाई शन्ति प्रक्रियामा ल्याउँदा होस् या २०६२/६३ सालमा झण्डै २ सय ५० वर्ष पुरानो राजतन्त्र फाल्ने दोस्रो जनआन्दोलन होस् या त २०७२ सालमा ‘नेपालको संविधान २०७२’ जारी गर्दा नेपाली कांग्रेसले नेतृत्वदायी भुमिका खेलेर देशलाई निकास दिई आफुलाई आर्दश पार्टी सावित गरेको कुरा सर्वविदितै छ ।
म पनि नेपाली कांग्रेसको लोकतान्त्रिक आर्दशलाई आत्मासात गरी विद्यालय जीवनमा कक्षा ८ मा बर्दियामा अध्ययन गर्दादेखि सक्रिय रुपमा नेपाल बिद्यार्थी संघबाट नेपाली कांग्रेसको राजनीति सुरु गरे पश्चात यही राजनितिक यात्राका क्रममा २०४२ सालमा तत्कालिन कोहलपुर गाविस हालको कोहलपुर नगरपालिकामा बसाई सराई गरेर आएदेखि पार्टीका विभिन्न तह र तप्कामा रही निरन्तर रुपमा संगठन निर्माणका लागी खटिइरहेको छु ।
२०४६ को जनआन्दोलनमा सक्रिय रुपमा सहभागी रहदै देशमा राजनीतिक परिवर्तन सँगै निरन्तर रुपमा नेपाली कांग्रेसका कार्यकर्ताका रुपमा समाज र देशका लागी खटिरहे । यसै क्रममा २०५४ को स्थानीय निर्वाचनमा पार्टीका तर्फबाट तत्कालिन कोहलपुर गाविस अध्यक्षको आधिकारीक उम्मेदवार गराइयो । निर्वाचनमा अपेक्षाकृत नतिजा नआएता पनि निरन्तर रुपमा पार्टी र समाजप्रति इमान्दारिताका साथ सक्रिय रहिरहे । देशमा माओवादी जनयुद्धका क्रममा निर्भिक भएर निरन्तर रुपमा पार्टीका कार्यकर्ता संरक्षण र संगठन विस्तारमा लागिरहे ।
२०६२/६३ का जनआनदोलनका क्रममा कोहलपुर क्षेत्रमा नेतृत्वहरुसँग सहकार्य गर्दै अहोरात्र खटेको कुरामा तपाईहरु जानकार हुनुहुन्छ । २०६२/६३ को आनदोलन पछि देशमा शन्ति प्रक्रिया सुरु भएपछि २०६४ सालमा कोहलपुर उद्योग वाणिज्य संघको अध्यक्षमा निर्वाचित भए पश्चात सार्वजनिक पदमा बसेर काम गर्ने सुनोलौ अवसर प्राप्त भयो । यसअघि कोहलपुर उद्योग वाणिज्य संघमा रहेका बेथितीलाई व्यवस्थापन गर्ने र कोलपुरमा प्रथम औधोगिक व्यापार मेला तथा कोहलपुर महोत्सव सफलता पुर्वक यसै कार्यकालमा सबैको साथ र सहयोगबाट सम्पन्न गर्न सफल भयौं ।
त्यस पश्चात प्रत्येक उद्योग वाणिज्य संघको निर्वाचनमा पार्टीको तर्फबाट दिइएको संयोजकको भुमिका सक्रिय रुपमा निर्वाह गर्दै पटक-पटक पार्टीको आधिकारीक उम्मेदवारलाई जिताउन सफल भएको कुरा यहाँहरुलाई जानकारी नै छ । पार्टीको १२ औं महाधिवेशन बाट जिल्ला कार्यसमितिको सदस्य निर्वानचित भई सफलतापुर्वक एक कार्यकालको जिम्मेवारी निर्वाह गरे । म जिल्ला कार्यसमितिको सदस्य भइसकेको भएतापनि राजनीतिक महत्वकांंक्षा र मर्यादाक्रमलाई थाती राखी कोहलपुर नगरमा पार्टी संगठनलाई सुढृढ र मजबुत गराउनुपर्ने आवश्यकतादेखि कोहलपुर नगरको पार्टी संगठन विस्तार गर्न लागेको कुरा उल्लेख गर्दछु ।
नेपाली काँग्रेस जस्तो लोकतान्त्रिक पार्टीमा पार्टी संगठन मजबुत गर्न नेतृत्वमा पुग्न र पार्टीको आगुवाइ गर्ने चाहना जो कोहिमा पनि हुनु स्वभाविक हुन्छ । लोकतान्त्रिक पार्टीमा आन्तरिक प्रतिस्पर्धा हुनुले आन्तरिक लोकतन्त्रलाई अझ मजबुत बनाउँछ । यसलाई अन्यथा लिनु हुदैन र मैले पनि लिएको छैन । पार्टीको आन्तरिक प्रतिस्पर्धामा न कसैको हार हुन्छ, न त कसैको जित हुन्छ । त्यो त सिंगो पार्टीको जित हुन्छ । पार्टीको नेतृत्व लिने क्रममा कोही विजेता हुन्छन् भने कोही जनता र पार्टी सदस्यहरुले चाहँदा चाहदै पनि विभिन्न कारणले उपविजेता हुन्छन् ।
जसको एक पात्र म पनि हुँ । म नगर अधिवेशनमा उपविजेता भएपनि अधिवेशनबाट आएको परिणामलाई सहर्ष स्वीकार गर्दै निर्वाचित कोहलपुर नगर कार्यसमिति तथा कोहलपुर नगरका १५ वटै वडाका सभापति, पदाधिकारी, सदस्यहरु र क्षेत्रिय प्रतिनिधिहरु सबैमा हार्दिक बधाईका साथ सफल कार्यकालको शुभकामना दिन चाहन्छु । पार्टी संगठन सुढृढ र मजबुत बनाउने कार्यमा अग्रसर रहनु हुनेछ, भन्ने विश्वास लिएको छु । नगर कार्यसमितिको यस अभियानमा मेरो निरन्तर साथ सहयोग, समर्थन र सहकार्य रहने कुरा जानकारी गराउँदछु ।
यति खेर सिङ्गो देश तीनै तहको निर्वाचनको तयारीमा छ । यसैक्रममा नेपाली कांग्रेस पनि निर्वाचनको हिस्सेदार रहनेछ । पार्टीको आन्तरिक प्रतिस्पर्धाको क्रममा भएका रोस र रिसलाई बिर्सिएर जनता माझ जाने बेला आएको छ । म पनि मेरो व्यक्तिगत तर्फबाट आन्तरिक प्रतिस्पर्धामा भएका तिक्ततालाई बिर्सिएर अब हुने तीनै तहको निर्वाचनमा कम्युनिष्ट पार्टीको अराजक भ्रष्ट शासन शैलीका विरुद्ध नेपाली कांग्रेस पार्टीका लागि निरन्तर खटिनेछु ।
आम जनतामा हाम्रो पार्टीको बलियो उपस्थिती हुँदा हुँदै पनि विगतका निर्वाचनमा जित्दा जित्दै पनि हार व्यहोर्नु परेको तितो यथार्थ छ । व्यक्तिवादी सोच, अहंमता, हामी भित्रको बेमेल, खुट्टा तान्ने प्रवृत्ती, चुनावमा टिकट नपाउँदाको रोस, कुण्ठाको राजनीति जस्ता विविध कारणले जनप्रतिनिधी हुनबाट बञ्चित भयौं । जसको फलस्वरुप कम्युनिष्ट अराजकता, भ्रष्टाचार र अनियन्त्रित शासन शैलीको सिकार हुन आम नेपाली जनता बाध्य भएका छन् । यसका विरुद्धमा तीनै तह स्थानीय, प्रदेश र संघको निर्वाचन नेपाली कांग्रेसले जित्नुपर्ने बाध्यकारी परिस्थिती छ ।
हामी सम्पुर्ण कांग्रेसप्रति आस्था राख्ने साथीहरु एकजुट भएर पार्टीको आधिकारीक उम्मेदवारलाई विजय बनाएर विधीको शासन सञ्चालन गरी आम जनताका न्युनतम आवश्यकताको सुरक्षित अनुभुती गराउनुछ । यो पार्टी विजेता र उप-विजेता हुने दुबैको हो । अन्य निर्वाचनमा दुबै पक्ष एक भएर लागी पार्टीलाई जिताउनु पर्दछ ।
वडा र नगर कार्यसमितिमा उप-विजेता हुनु भएका सबै साथीहरुलाई १४ औं महाधिवेशनको तिक्तता भुलेर विजेता भएका साथीहरुलाई सहयोग गर्न र विजय भएकाहरुले उपविजेता भएकाहरुलाई साथमा लिएर पार्टी संगठनमा लाग्नुपर्नेछ । यस महाअभियानमा प्रत्येक नेपाली कांग्रेसका क्रियाशिल साथीहरु, नवनिर्वाचित साथीहरु लगायत म पनि जोडिने प्रतिज्ञा गर्दै हार्दिक अपिल गर्दछु ।
अन्त्यमा, मलाई यस १४ महाधिवेशनका क्रममा प्रत्यक्ष, अप्रत्यक्ष रुपमा सहयोग गर्ने र गर्न असमर्थ रहनु हुने सबैलाई आभार व्यक्त गर्न चाहन्छु । पुनश्च : म पदमा नरहेता पनि पार्टी संगठन, पार्टीका साथीहरु र आम नगरिकहरुको सेवा र सहयोगको लागि जुन सुकै समयमा पनि तत्पर रहनेछु ।
म पदमा नरहेतापनि पार्टी संगठन, पार्टीका साथीहरु र आम नगरिकहरुको सेवा र सहयोग र पार्टी हितका लागि जुन सुकै समयमा पनि तत्पर रहनेछु । १५ वटै वार्डमा विजयी हुनुभएका वडा सभापति ज्यूहरुले आफ्नो निकटतम प्रतिस्पर्धी साथीलाई तत्कालै सदस्यमा मनोनयन गरी मर्यादा क्रममा दोस्रोमा राख्नुहुन अनुरोध गर्दछु ।
नगर सभापति र वडा सभापतिज्यूहरुले समिति विस्तार गरी सदस्यहरु मनोनयन गर्दा टोल, लिङ्ग र जातलाई मिलाई प्रतिस्पर्धीसँग समन्वय गरी विस्तार गर्नको लागि पनि अनुरोध गर्दछु, यसमा विशेष भूमिका निर्वाचितहरुको नै हुनेछ । यसरी कार्य समिति विस्तार गर्दा पार्टी बलियो हुने र १४ औं महाअधिवेशनको तिक्तता पनि कम हुने, अब हुने तीनै तहको निर्वाचनमा पार्टीले अग्रणी रुप लिने छ भन्ने विश्वास लिएको छु ।
हाल कोभिड-१९ को सक्रमण तिब्र गतिमा बढी रहेको हुँदा सामाजिक दुरी कायम राखी स्वास्थ्य मापदण्ड अपनाई पार्टी संगठन तथा आफ्नो दैनिक क्रियाकलापमा लाग्नु हुन अनुरोध गर्दछु । जय नेपाल !
(श्रेष्ठ नेपाली कांग्रेसको १४ औं महाधिवेशन अन्तरगत कांग्रेस कोहलपुर नगर निर्वाचनमा सभापति पदका उपविजेता हुन् )
