नेपालगन्ज : अचेल उनको ब्यस्तता ह्वात्तै बढेको छ । बिहानदेखी बेलुकासम्म जनताको सेवामै ब्यस्त हुन्छन्, उनी । जानकी गाउँपालिका वडा नम्बर ५ का वडाअध्यक्ष टिकानाथ यादवको दैनिक अचेल फरक भइरहेको छ ।
जनप्रतिनिधी भइसकेपछि वडाको समग्र विकासका लागि उनी अहिले सक्रिय छन् । ‘बिहानदेखी बेलुकासम्म जनताकै सेवामा हाजिर हुन्छु, वडालाई समृद्ध बनाउने मेरो सपना छ,’ उनी भन्छन् । वडाअध्यक्ष यादवले जीवनमा धेरै आरोह-अवरोह पार गरिसकेका छन् ।
२०४६ फागुन २१ गते जानकी-५ गुुरुवा गाउँमा पिता सिताराम यादव र माता गुल्बी यादवको कोखबाट जन्मेका उनी परिवारका काईलो छोरा हुन् । यादवले पशुपति बोर्डिङ स्कुल राँझामा कक्षा १० सम्म अध्ययन गरी सोही बिद्यालयबाट २०६१ सालमा एसएलसी उर्तीण गरे । त्यसपछि महेन्द्र नमुना माध्यामिक बिद्यालय नेपालगन्जबाट आई.एस्सी उर्तीण गरे र अध्ययनसँगै समाजसेवामा आवद्ध हुन थाले ।
स्थानीय महेन्द्र बहुमुखी क्याम्पसबाट उनले बिएस्सी उर्तीण गरे । ‘म बिएस्सी अध्ययन गर्दाखेरी नै मलाई राजनीतिको नसाले छोइसकेको थियो, त्यतिखेर नै पार्टीको राजनीतिमा लागेको हुँ,’ उनी सम्झिन्छन् । त्यतिबेला यादव साबिक बेलहरी गाविस वडा नम्बर ५ मा नेपाली कांग्रेसको वडा ईकाइ सचिव भए ।
राजनीतिमा लागेपनि उनले आफ्नो पढाईलाई भने रोकेनन् । भारतको फैजावादस्थित अवध बिश्व बिद्यालयबाट एम.एस्सी उर्तीण गरे । यादवले आईएस्सी उर्तीण गरिसकेपछि अध्ययनसँगै अध्यापनको काम पनि गर्दै आएका थिए । आईएस्सी उर्तीण गरिसकेपछि उनले स्प्रिङडेल एकेडेमी भुजईगाउँ नेपालगन्जमा अध्यापन गरे । त्यसपछि पशुपति बोर्डिङ स्कुल राँझामा अध्यापन गरे ।
यादवले जनता निम्न माध्यामिक बिद्यालय होलिया, आर्दश माध्यामिक बिद्यालय डि.गाउँ खजुरा, मंगलप्रसाद मावि नेपालगन्जका साथै नेपालगन्ज टेक्निकल कलेज, भेरी प्राविधिक शिक्षालय, महेन्द्र बहुमुखी क्याम्पसमा पनि अध्यापन गरे । उनी विज्ञान विषयको शिक्षक थिए ।
कलिलै उमेरमा उनी पार्टीको राजनीतिमा सक्रिय भए । २०६४ सालमा सुशिल कोइरालाको हातबाट सदस्यता लिएर उनी राजनीतिमा सक्रिय भएका थिए । ‘सदस्यता लिइसकेपछि सुशिल दाईलाई जिताउन हामीले अभियान नै चलाएका थियौं, त्यसपछि २०७४ को निर्वाचनमा पनि बादशाह कुर्मी दाईलाई चुनाव जिताउन अभियान चलायौं,’ उनले भने ।
पार्टीको १४ औं महाधिवेशनमा यादव जानकी गाउँपालिका सचिवमा निर्विरोध निर्वाचित भए । २०७९ सालको स्थानीय तह निर्वाचनमा जानकी गाउँपालिका वडा नम्बर ५ को वडाअध्यक्षका लागि निर्विरोध सिफारिस भएका थिए र वडाअध्यक्षमा निर्वाचित भए । उनी अहिले जानकी गाउँपालिकामा कार्यपालिका (बोर्ड) सदस्य, पुर्वाधार विकास संयोजक तथा गाउँपालिका प्रवक्ताको जिम्मेवारीमा छन् ।
नेपालगन्ज उपमहानगरपालिकासँगै जोडिएपनि जानकी गाउँपालिका विकासबाट अहिलेसम्म पछाडी परेको वडाअध्यक्ष यादव बताउँछन् । ‘यहाँ भौतिक संरचनाको कमी छ, बिद्यालयमा शिक्षाको विकास हुन सकेको छैन, कन्या बिद्यालय छैनन्,’ उनले भने । वडा र गाउँपालिकामा आधुनिक कन्या बिद्यालय स्थापना गर्ने आफ्नो सोच रहेको यादवले बताए ।
‘कन्या बिद्यालय स्थापना गर्न निर्णय गराउने सोच छ, यस विषयमा सबै सकारात्मक हुनुहुन्छ, छोरीहरुको लागि विशेष समतामुलक कार्यक्रम ल्याउने मेरो योजना छ,’ उनले भने । यादवको विचारमा राजनीति एकदमै जटिल छ । यादव भन्छन्, ‘राजनीति सिद्धान्त भन्दा स्वार्थ केन्द्रित भइरहेको छ ।’
