नेपालगन्ज : मञ्चमा उपस्थित हुने ६ जना कलाकारका साथै प्राविधिक र ब्यवस्थापन गरेर ७० जनाको विशाल टिमसहित यतिबेला नेपथ्य टोली नेपालगन्जमा रहेको छ । पाँच वटा ट्रक र दुई वटा बसहरुमा आइपुगेको उक्त टोलीलाई सोमबारै आयोजक मानवसेवा आश्रमका पदाधिकारीहरुले स्वागत गरेका थिए ।
टोली यही मंसिर २९ गते नेपालगन्ज रंगशालामा हुन लागेको नेपथ्य लाइभ कन्सर्टको तयारीमा जुटेको हो ।यसअघि नेपथ्यले बिराटनगर, वीरगन्ज, हेटौंडा र चितवनमा हजारौं दर्शकका बीच भब्य कन्सर्ट प्रस्तुत गरिसकेको छ । नेपथ्य ब्याण्ड नेपाल र विश्वभरि छरिएका नेपाली युवा पुस्तामाझ लोकप्रिय 'लोकरक' संगीत टोली हो ।
यसपटकको महिनादिन लामो नेपाल भ्रमण अन्तर्गत नेपालगन्जमा पाँचौ प्रस्तुती दिन लागेको हो । कार्यक्रम मंसिर २९ गते बिहीबार बेलुकी ४ बजे रंगशालामा सुरु हुनेछ । नेपालगन्जमा यसअघि पनि एकपटक उपस्थित भइसकेको नेपथ्यले यो मैदानमा भने आफूलाई पहिलो पटक प्रस्तुत गर्न लागेको हो ।
पछिल्लो पटक नेपथ्यले १० वर्षअघि ‘शान्तिको लागि शिक्षा’ अभियान अन्तर्गत आफूलाई नेपालगन्जमा प्रस्तुत गरेको थियो । ब्याण्डले यसपटक पहिलो चोटी नेपालगन्जमा खुला आकाशमुनि 'भब्य' मञ्च तयार पारेर कन्सर्ट दिन लागेको हो ।
संगीतका साथसाथै मानवताको उद्देश्यसहित मानवसेवा आश्रमको आयोजनामा यसपटक नेपथ्यले मुलुकभरको यात्रा गर्नलागेको हो । यस क्रममा नेपालको पूर्वीदेखि पश्चिमसम्म गरेर दस स्थानमा कन्सर्ट आयोजना गरिनेछ । बिराटनगरबाट सुरुभएको यो यात्रा एक महिनासम्म चल्नेछ । यात्रा सुरुगर्नुअघि नेपथ्य टोलीले काठमाडौंमा रिहर्सल सम्पन्न गरेको थियो ।
बिहीबारको प्रस्तुतीका लागि नेपालगन्ज रंगशालामा मञ्च बनाउने काम धमाधम सुरु भइसकेको नेपथ्य टोलीले जनाएको छ । सुरक्षा तथा समारोेह स्थल व्यवस्थापन समितिका संयोजक जयनारायण शाहसँगको समन्वयमा कन्सर्टका लागि आवश्यक मञ्च ब्यवस्थापन कार्य सुरु गरिएको मानवसेवा आश्रमले जनाएको छ ।
बुधबार बेलुकी त्यहाँ आवाज तथा प्रकाश इत्यादिको परिक्षण गरिनेछ । मञ्च तथा प्रविधिका हिसाबले यो प्रस्तुती अहिले विश्वभर प्रचलित आधुनिक रक कन्सर्टको अवधारणालाई पालना गरेको कार्यक्रम हुनेछ । त्यो स्तरलाई कायम गर्नकै निम्ति कलाकार बाहेक पनि ठूलो संख्यामा प्राविधिक तथा व्यवस्थापन टोलीले साथमा यात्रा गर्नुपरेको हो ।
‘संगीतबाट मनोरञ्जन मात्र नभइ लोक कल्याणका हिसाबले पनि नेपथ्यको कार्यक्रम नेपालगंजका लागि महत्वपूर्ण छ,’ मानवसेवा आश्रमको नेपालगन्जस्थित संयोजक सिर्जना ओली भन्छिन्, ‘कार्यक्रमलाई भब्य रुपमा प्रस्तुत गर्न आयोजकका हिसाबले सम्पूर्ण तयारी पुरा गरिसकेका छौं ।’
ओलीका अनुसार नेपालगन्ज कन्सर्टका टिकटहरु धम्बोजी तथा विपी चोकस्थित स्टलबाट धमाधम बिक्री भइरहेका छन् । त्यसैगरि सहरका विभिन्न रेष्टुरेन्ट तथा पसलहरुमा पनि टिकट विक्री खुलागरिएको छ । समयमै टिकट लिएर सिट सुरक्षित गर्न चाहने दर्शकहरुले अनलाइन मार्फत् पनि टिकट काट्न सक्ने उनले बताइन् ।
त्यसको निम्ति मानवसेवा आश्रमको आधिकारिक वेबसाइट (msa.org.np) मार्फत सोझै काट्न सकिन्छ । त्यसैगरि नेपथ्य ब्याण्डको वेबसाइट (nepathya.com.np) बाट पनि कन्सर्टहरुको टिकट उपलब्ध गराइएको छ। टेलिफोन मार्फत् सिट सुरक्षित गर्नचाहने दर्शकहरुका निम्ति ९८५५०७६००६ र ९८४३३४७६४५ नम्बर उपलब्ध छन् ।
