बाँके(अगैया) : बाँकेको अगैयास्थित राप्ती नदी । प्रकृतिसँग रमाउनेहरुका लागि अहिले यो ठाउँ महत्वपूर्ण गन्तब्य स्थल बनेको छ । राप्ती नदीमा पानीको सतह घटेको छ, तर सफा छ । सिक्टा सिँचाइ आयोजनाका अधिकांस ढोका बन्द छन् ।
केही ढोका खोलेर पानीलाई प्राकृतिक रुपले बग्न दिइएको छ । अधिकांस ढोका बन्द हुँदा राप्ती नदी यतिखेर कुनै ताल जस्तै बनेको छ । हेर्दा लाग्छ, कुनै प्राकृतिक रुपले नै निर्मित ताल हो । राप्ती नदीको यो रमणीय दृश्यले मन आनन्दित हुन्छ ।
राप्तीको सफा पानीभित्र खेलिरहेका विभिन्न प्रजातीका माछा, परिपरी चुरे पहाड र घना जंगलको प्राकृतिक सौन्दर्यता, चरा चुरुङ्गीको मिठो आवाजले जो-कोहीलाई पनि रमाईलो अनुभुति हुन्छ । अर्कोतिर पिकनिक खान टाढा-टाढाबाट आएका युवा युवतीहरु आपसमा रमाईरहेको दृश्यले यहाँ बेग्लै रौनकता दिइरहेको हुन्छ ।
यहाँ नेपालगन्ज, कोहलपुर, दाङ, सल्यान, रोल्पा लगायत ठाउँबाट पिकनिक खान दैनिक रुपमा ठुलो संख्यामा आउने गर्छन् । टाढा-टाढाबाट आएका युवा युवतीहरु राप्ती नदी र वरिपरीको पहाडको रमणीय पृष्ठभुमीलाई साक्षी राखेर सिक्टाको ब्यारेजमा फोटो र सेल्फी खिच्न भ्याई-नभ्याई गर्छन् ।
माछाका पारखीहरुका लागि पनि राप्ती सोनारी उत्तम ठाउँ हो । राप्ती नदीकै छेउमा अगैया बजार अवस्थित छ । माछाका पारखीहरु राप्ती सोनारीमा रहेको अगैया बजारमा पुग्छन् अनि माछाको स्वाद चाख्न पाउँछन् । राप्ती सोनारी गाउँपालिका वडा नम्बर २ मा पर्ने यो बजारको मुख्य विशेषता भनेको नै राप्तीको माछा हो ।
स्थानीय माछाको स्वाद लिनका लागि पनि यहाँ टाढा-टाढाबाट पनि मानिसहरु आउँछन् । बाँके राष्ट्रिय निकुञ्जसँगै जोडिएको हुँदा राप्ती सोनारी क्षेत्र पर्यापर्यटनका हिसाबले पनि सम्भावना बोकेको ठाउँ मानिएको छ । विश्वकै दुर्लभ वन्यजन्तुहरु बाँके राष्ट्रिय निकुञ्ज अन्तरगत राप्ती सोनारी क्षेत्रका वन, जंगलमा सहजै देख्न सकिन्छ ।
दुर्लभ वन्यजन्तु पाटेबाघको बासस्थान पनि यही राप्ती सोनारीमा रहेको छ । दिन दहाडै राप्ती नदी र मानव बस्ती छेउछाउमा आएर पाटेबाघ घुमिरहेको दृश्य देख्न सकिन्छ । बाघ लगायत अन्य वन्यजन्तुहरु पनि यहाँ प्रशस्त मात्रामा देखिन्छन् । पुर्वपश्चिम राजमार्ग जोडिएको हुँदा यहाँ आउन र जानका लागि सहज मानिन्छ ।
राप्ती सोनारीको वडा नम्बर १ कुसुमदेखी अगैयासम्म राप्ती नदीमा र्याफ्टिङको परिक्षण सफल भइसकेको छ । लुम्बिनी प्रदेश सरकारले यसलाई चाडै कार्यान्वयनमा ल्याउन सकेमा आन्तरिक र बाह्य पर्यटनको पनि प्रचुर सम्भावना देखिन्छ । राप्ती नदीमा गोही लगायत थुप्रै जलचरको बासस्थान रहेको छ ।
अगैयादेखी नजिकै प्रशिद्ध धार्मिक तिर्थस्थल भुवर भवानी मन्दिर छ । यहाँदेखी अर्को धार्मिक स्थल बर्फानी बाबा आश्रम पनि छोटो दुरीमै पर्छ । राप्ती सोनारीमै रहेको रमणीय गाईलेक, खर्चे ताल पनि घुम्न लायक ठाउँ हुन् । समग्रमा राप्ती सोनारी क्षेत्र पर्यटकिय गन्तब्यका रुपमा रहेको ठाउँ हो । संघ, प्रदेश र स्थानीय सरकारले यहाँ अझै केही पर्यटकीय पुर्वाधार निर्माण गर्न आवश्यक छ । अगैयास्थित पिकनिक स्थललाई अझै ब्यवस्थित र फराकिलो बनाउनुपर्छ ।
पिकनिक स्थलमा पर्याप्त मात्रामा शौचालय, खानेपानी, बिद्युत सेवा, गार्डेन जस्ता पुर्वाधार पुर्याउनुपर्ने देखिन्छ । अहिलेसम्म निर्मित भएका संरचनाको संरक्षण र सम्बर्धन गर्न सकेमा राप्ती सोनारीले पर्यटन क्षेत्रमा फड्को नै मार्ने यहाँका स्थानीय बासिन्दाको विश्वास छ ।
भिडियो हेर्नुस् :
