नेपालगन्ज : लुम्बिनी प्रदेश स्तरीय माघ महोत्सव नेपालगन्जमा बुधबारदेखी सञ्चालनमा आएको छ । थारु भाषा, सँस्कृती, लोक कला र मौलिक हक अधिकारको जगेर्ना गर्ने उद्देश्यले स्थानीय रामलिला मैदानमा उक्त महोत्सव सञ्चालनमा आएको हो ।
थारू कल्याणकारीणी सभा नेपालगन्ज उपमहानगर समितिको आयोजनामा सञ्चालित उक्त महोत्सवको कार्यक्रमका प्रमुख अतिथी एवम् नेपालगन्ज उपमहानगरपालिकाका मेयर प्रशान्त विष्टले उद्घाटन गरे । लुम्बिनी प्रदेशका पर्यटन, ग्रामीण तथा शहरी विकास मन्त्री डिल्लीबहादुर चौधरीलाई प्रमुख अतिथीका रुपमा बोलाइएपनि प्रदेश सरकार गठन सम्बन्धी महत्वपूर्ण बैठक भएकाले उपस्थित हुन सकेनन् ।
उद्घाटन शत्रमा प्रमुख अतिथी एवम् नेपालगन्ज उपमहानगरपालिकाका मेयर विष्ट, राप्ती सोनारी गाउँपालिकाका संस्थापक अध्यक्ष लाहुराम थारु, नेपाली काँग्रेस बाँकेका सभापति नारायणप्रसाद गौडेल, राप्ती सोनारी गाउँपालिका उपाध्यक्ष मनिषासिंह थारु, नागरिक उन्मुक्ती पार्टी बाँकेका अध्यक्ष सुरेश थारु, थारु कल्याणकारिणी सभा बाँकेका अध्यक्ष बिनोद थारु, थारु कर्मचारी समाजका अध्यक्ष जितबहादुर चौधरी, वरिष्ठ बालरोग विशेषज्ञ डा. रोमा बोरा, थारु समुदायका अगुवा फुलाराम थारु, चन्द्रबहादुर थारु, मंगल थारु, बेसका केन्द्रिय सदस्य संगिता चौधरी, नेपाल प्रेस युनियन बाँकेका अध्यक्ष अर्जुन ओली, पत्रकार महासंघ बाँकेका उपाध्यक्ष करुणा शाह र सचिव कमल डाँगी, आदीवासी जनजाती पत्रकार संघ बाँकेका अध्यक्ष भगतसिंह थारु, थारु पत्रकार संघ बाँकेका पुर्वअध्यक्ष बिमला चौधरी, नेपाली काँग्रेस राप्ती सोनारीका सचिव सन्तोष चौधरी, पश्चिम तारा नेपालका अध्यक्ष परिना चौधरी, लगायत अतिथीको उपस्थिती रहेको थियो ।
दुई दिन सम्म चल्ने उक्त महोत्सवमा थारू समुदायको परम्परागत भेषभूषा सहित साँस्कृतिक प्रस्तुती, थारू विशेष खाना, मौलिक खानाका परिकार, हस्तकला सामाग्री तथा थारू पहिरन लगायत स्थानीय झाँकी प्रदर्शन गरिएको थारु कल्याणकारीणी सभा नेपालगन्ज उपमहानगर समितिका अध्यक्ष बासमती थारुले जानकारी दिइन् ।
महोत्सवको पहिलो दिन चर्चित थारु मोडेल सुनिता दहित, गायक मनिराम चौधरी, लक्ष्मी चौधरी, फत्तेपुरस्थित थारु गोचाली समाजका कलाकार लगायतले आ आफ्नो प्रस्तुती देखाएका थिए । यस्तै महोत्सवमा राष्ट्रिय हास्य कलाकार जितु नेपाल (मुन्द्रे) लगायत कलाकारको बेजोड प्रस्तुती रहने भएको छ ।
महोत्सव हेर्न आउने दर्शकलाई मनोरञ्जनका लागि राष्ट्रिय तथा स्थानीय कलाकारले थारु पहिरनमा साँस्कृतिक नृत्य, झुला, थारु परिकारका स्टल, विभिन्न किसिमका खेल, लगायत थारु समुदायको पहिचान झल्काउने आयोजकले जनाएको छ ।
भिडियो हेर्नुस् :
महोत्सवमा थारु परिकार ढिक्री, घोङघी, सिद्रा माछाको चटनी, आलुको अचार लागयत परिकारहरु प्रदर्शनीका साथै बिक्रीका लागि राखिएको छ । महोत्सव उद्घाटन गर्नुअघि नेपालगन्जको धम्बोझी चोकबाट थारु भेषभुषामा सजिएका थारु समुदायका युवा युवतीहरु सहितको झाँकी सुरु भएको थियो । उक्त झाँकी सहिद सेतु बिक चोक, न्यूरोड, त्रिभुवन चोक, भेरी अस्पताल हुँदै रामलिला मैदानमा पुगेर कार्यक्रममा परिणत भएको थियो ।
