नेपालगन्ज : नेपालगन्जमा सञ्चालित लुम्बिनी प्रदेश स्तरीय माघ महोत्सव बिहीबार समापन भएको छ । थारु भाषा, सँस्कृती, लोक कला र मौलिक हक अधिकारको जगेर्ना गर्ने उद्देश्यले थारू कल्याणकारीणी सभा नेपालगन्जले स्थानीय रामलिला मैदानमा महोत्सव सञ्चालनमा ल्याएको थियो ।
दुई दिनसम्म सञ्चालन भएको उक्त महोत्सवमा थारू समुदायको परम्परागत भेषभूषा सहित साँस्कृतिक प्रस्तुती, थारू विशेष खाना, मौलिक खानाका परिकार, हस्तकला सामाग्री तथा थारू पहिरन लगायत स्थानीय झाँकी प्रदर्शन गरिएको थियो ।
महोत्सवमा दुई दिनसम्म चर्चित थारु मोडेल तथा कलाकारले गीत तथा नृत्य प्रस्तुत गरेका थिए । महोत्सवमा बिहीबार चर्चित हास्य कलाकार जितु नेपाल (मुन्द्रे) ले दर्शकलाई हसाएका थिए । महोत्सवमा ढिक्री, घोङघी, सिद्रा माछाको चटनी, आलुको अचार लागयत परिकारहरु प्रदर्शनीका साथै बिक्रीका लागि राखिएको थियो ।
महोत्सव अवलोकन गर्न पुगेका दर्शकसामु थारु परिकार विशेष आर्कषण बनेको थियो । थारु कल्याणकारीणी सभा नेपालगन्जका अध्यक्ष बासमती थारुको सभापतित्वमा आयोजित समापन कार्यक्रममा प्रमुख अतिथी एवम् थारु कर्मचारी समाजका अध्यक्ष जितबहादुर चौधरी, थारु कल्याणकारिणी सभा बाँकेका अध्यक्ष बिनोद थारु, थारु समुदायका अगुवा तथा समाजसेवी लक्ष्मण थारु, बेसका केन्द्रिय सदस्य संगिता चौधरी, नेपाल प्रेस युनियन बाँकेका अध्यक्ष अर्जुन ओली लगायत अतिथीले महोत्सवमा योगदान पुर्याउने कलाकार, सञ्चारकर्मी, विभिन्न सहयोगी निकायलाई प्रशंसा पत्र प्रदान गरेर सम्मान प्रकट गरेका थिए ।
