यही चैत ४ गते बाँसगढी उद्योग वाणिज्य संघको निर्वाचन हुँदैछ । उक्त निर्वाचनका लागि लोकतान्त्रिक समावेशी प्यानलबाट अध्यक्ष पदमा नरबहादुर ओलीले प्रतिस्पर्धा गरिरहेका छन् । उक्त प्यानलले ओलीलाई दूरदर्शी, पारदर्शी, कुशल समन्वयकर्ता, सुशासनका हिमायती, कर्तव्यनिष्ठ, समाजसेवी उम्मेदवारका रुपमा अगाडी सारेको छ ।
अध्यक्ष पदका उम्मेदवार ओली ओम बैभव लक्ष्मी प्रालि, ओम शिव शंकर स्टोर्स र बर्दिया डिष्टिलरी प्रा.लि.मा आबद्ध छन् । ओम बैभव लक्ष्मी प्रालिले कोहलपुर र बाँसगढीमा होटल सञ्चालन तथा टेडिङ ब्यापार गरिरहेको छ ।
ओलीले ओम बैभव, ओम शिव शंकर स्टोर्स र बर्दिया डिष्टीलरी प्रा.लि. गरी तीन वटा ब्यवसायिक प्रतिष्ठानबाट ४ सय ५० भन्दा बढीलाई प्रत्यक्ष रोजगारी दिदै आएका छन् । राज्यका निकायबाट उनी करदाताको रुपमा सम्मानित समेत भइसकेका छन् । यिनै उम्मेदवार ओलीसँग दूरसञ्चार डटकम का लागि गरिएको संवाद :-
नरबहादुर ओली
अध्यक्ष पदका उम्मेदवार
बाँसगढी उद्योग वाणिज्य संघमा तपाईको उम्मेदवारी किन ?
म विगत २४ वर्षदेखी यस बाँसगढी बजारलाई केन्द्र मानेर ब्यापार गर्दै आइरहेको छु । पहाडी किसान, साना ब्यवसायी, थोक ब्यवसायीहरुका समस्याहरु राम्रोसँग बुझेको छु । ब्यवसायी तथा किसानका समस्याहरुलाई प्राथमिकतामा राखी सम्बन्धित निकायमा पुर्याउन मेरो उम्मेदवारी दिएको छु । बाँसगढी उद्योग ब्यापार संघ आजसम्म महासंघको सदस्य बन्न सकेको छैन । महासंघमा प्रवेश गराई बाँसगढीलाई राष्ट्रिय स्तरमा पहिचान गराउन मेरो उम्मेदवारी दिएको छु ।
निर्वाचनमा होमिदै गर्दा कत्तिको ब्यस्त हुनुहुन्छ ?
निर्वाचनमा ब्यस्तता स्वभाविकै हो । मतदातालाई भेटघाट गर्नमै ब्यस्त छु । मतदाताबाट हौसला पाइरहेको छु । बाँसगढीमा तपाईको आवश्यकता अपरिहार्य छ, तपाईजस्तो योजना, भिजन भएको मान्छे जसरी पनि नेतृत्वमा आउनुपर्छ भनेर मतदाताले भन्नु भएको छ । भेटघाटलाई तिब्रता दिएको छु । ब्यस्त नै छु ।
उद्योगी, ब्यवसायीका प्रमुख समस्या के-के छन् ?
आज निजी क्षेत्र ध्वस्त अवस्थामा पुगेको छ । राज्यको नीतिको कारण यो अवस्था आएको मेरो ठहर छ । बैंक ब्याज, खुल्ला सिमाना, दोहोरो कर प्रणाली, अनावश्यक लेखा परिक्षण, राजनीतिक उतार चढापले गर्दा निजी क्षेत्र आतंक छ । यि समस्याहरुसँग कसरी हल गर्ने ? भनेर राज्यको नीति निर्माणमा पहुँच पुर्याई सुधार गर्ने विषयमा म लागिपरेको छु ।
तपाई निर्वाचित हुनु भयो भने उद्योगी ब्यवसायीका के-के माग पुरा गर्नुहुन्छ ?
ब्यवसायीहरुको बर्गिकरण गर्ने, ब्यवसायीहरुको भेला गराई समस्याहरुको पहिचान गर्ने र ति समस्याहरुको समाधान गर्नका लागि सम्बन्धित निकायमा प्रभावकारी भुमिका निर्वाह गर्न किसानहरुको उत्पादनको उचित मुल्यांकन, बजारीकरण र ब्यवसायी किसान बृद्धि गर्न स्थानीय सरकारसँग समन्वय गरी प्रभावकारी भूमिका निर्वाह गर्न खुल्ला सिमानाका कारण हुने अबैध ब्यापारलाई निषेध गर्न मेरो पहिलो कार्य रहनेछ ।
अन्त्यमा, आम उद्योगी, ब्यवसायीहरुलाई के भन्न चाहनु हुन्छ ?
मेरो उम्मेदवारी बाँसगढीको आवश्यकता हो, भन्ने ब्यवसायी साथीहरुको आवाज हो । म २४ वर्षदेखी ब्यवसाय गर्दै आएको छु । सानो ब्यवसायबाट माथी उठेर आज उद्योग सञ्चालनको तहसम्म पुगेको छु । योजना बनाई अगाडी बढ्ने र योजना कार्यान्वयन गर्न कुनै कसर बाँकी नराखेकाले म सफल भएको छु । बाँसगढी उद्योग वाणिज्य संघमा सबै ब्यवसायीहरुका अपनत्व हुने गरी कार्य गर्नेछु ।
मतदाताहरुले दिएको मतको उच्च मुल्यांकन गर्दै उहाँहरुको भावनाको कदर गर्नेछु । घोषणा पत्रमा उल्लेख भएका प्रतिवद्धता कार्यान्वयन गराएर दौडने छु । यि मेरा चुनावी नारा नभई मैले गर्न सक्ने कार्य हुन् । मतदातालाई पूर्ण रुपमा विवेक प्रयोग गरी मतदान गर्नु हुनेछ भन्ने म विश्वस्त छु ।
