नेपालगन्ज : क्यान्सरबाट पीडित भई अस्पताल भर्ना भएका नेपालगन्जका वरिष्ठ कलाकार श्यामानन्द सिंहको उपचार गर्न समस्या भएको छ । ६९ वर्षी सिंहको एक महिनाअघि पेटको आन्द्रामा क्यान्सर देखिएको थियो ।
अहिले उनी बिपी कोइराला मेमोरियल क्यान्सर अस्पताल चितवनमा भर्ना भएका छन् । तर, उपचार गर्न आर्थिक अभाव भएकाले सहयोग गर्न परिवारका सदस्यले सबैसँग आग्रह गरेका छन् । हस्तकला, चित्रकला, गीत, संगित, साहित्य र नाट्य लगायतका सिर्जनात्मक क्षेत्रमा आफ्नो छुट्टै पहिचान बनाउन सफल भएका कलाकार सिंह यतिबेला मृत्युसँग संघर्ष गरिरहेका छन् । उनको उपचारमा आर्थिक समस्या आएकाले परिवारले सहयोगका लागि आग्रह गरेको हो ।
सिंहका कान्छा छोरा सागर सिंहले यही हप्ताभित्र पिताको शल्यक्रिया गर्नुपर्ने भएकाले पैसाको जोहो गर्न मुस्किल परेको बताए । उनले आवश्यक सहयोगका लागि सबैसँग अपिल गरिएको बताए । जीवनभर कला र सिर्जनामै तल्लीन कलाकार सिंहलाई यतिबेला उपचारमा आर्थिक अभाव छ ।
सिंहको घरमा मानसम्मान, प्रमाणपत्र सयौँ छन्, तर यतिबेला उनलाई आर्थिक सहयोग चाहिएको छ । आर्थिक सहयोग गरेर बाबाको जीवन बचाईदिन छोरा सागरले आग्रह गरेका छन् । कलाकार सिंहले नेपालगन्ज-९ बाँकेगाउँस्थित आफ्नो घरको दोस्रो तलाका चार कोठालाई वर्षौदेखि संग्रहालय बनाएका छन् । कलाका पारखी, शुभेच्छुक एवं आमनागरिकका लागि उनले निःशुल्क अवलोकनको अवसर दिँदै आएका छन् ।
उक्त संग्रहालयमा सिंहद्वारा सिर्जित हस्तकला, चित्रकलाका सयौँ सिर्जना राखिएका छन् । क्यान्सरले थलिएका सिंहको अन्तिम इच्छा घरको संग्रहालयलाई राज्यले संरक्षण गरेर कहीँ स्थापित गरिदियोस् भन्ने रहेको छोरा सागरले बताएका छन् ।
करिब सय वटा सडक नाटक लेखन र अभिनय गरिसकेका सिंहले टेलिसिरियल ‘अभागन बने सुहागन’ को कथा लेख्नुका साथै कलाकारको भूमिका निर्वाह गरेका थिए । सिंहको उपचारमा सहयोगका लागि श्यामानन्द सिंह, ग्लोबल आइएमइ बैक खाता नम्बर ०२१०८०१००००२९४ र ई-सेवा आइडी ९८४८०१८८२७, खल्ती आइडी ९८५१०३९४२७ मा रकम पठाउन सकिने छोरा सागरले बताएका छन् ।
