ढकाललाई आर्थिक तथा प्रशासनिकसहित निमित्तको जिम्मेवारी

समाज

Home
समाज
ढकाललाई आर्थिक तथा प्रशासनिकसहित निमित्तको जिम्मेवारी

ढकाललाई आर्थिक तथा प्रशासनिकसहित निमित्तको जिम्मेवारी

बाँके (बैजनाथ) : बैजनाथ गाउँपालिकाको निमित्त प्रमुख प्रशासकीय अधिकृतको जिम्मेवारी विश्वराज ढकालले पाएका छन् । गाउँपालिकाको शिक्षा शाखा प्रमुख समेत रहेका उनले हालै निमित्त प्रमुख प्रशासकीय अधिकृतको जिम्मेवारी पाएका हुन् ।

संघीय मामिला तथा सामान्य प्रशासन मन्त्रालय अन्तरगत रहेको स्थानीय तह कर्मचारी प्रशासन शाखाले निमित्त प्रमुखको जिम्मेवारी कानुनी रुपमै दिएको हो । गाउँपालिकामा यसअघि प्रमुख प्रशासकीय अधिकृत रहेका धर्मराज न्यौपानेको जुम्ला सरुवा भएपछि केही समयदेखी बैजनाथको काम सञ्चालन गर्न कठिनाई भएको थियो ।

जनताको काम काज सहज रुपमा सञ्चालन गर्नका लागि गाउँपालिकाले नेपाल शिक्षा सेवा, शिक्षा प्रशासन समुह, अधिकृत स्तर आठौं तहका ढकाललाई निमित्त प्रमुख प्रशासकीय अधिकृतको अख्तियारी दिन गाउँपालिकाले मन्त्रालयको स्थानीय तह कर्मचारी प्रशासन शाखासँग अनुरोध गरेको थियो ।

ढकाललाई स्थानीय सरकार सञ्चालन ऐन २०७४ को दफा ८४ को उपदफा(४) अनुसार प्रमुख प्रशासकीय अधिकृत नखटाइएसम्मको लागि बढीमा २ महिनाको लागि कार्यालयको आर्थिक तथा प्रशासनिक कार्य गर्ने गरी जिम्मेवारी दिइएको शाखा अधिकृत बिकास सुन्दासले जानकारी दिएका छन् ।

गाउँपालिका अध्यक्ष प्रकाशबहादुर शाहीले मन्त्रालयले आर्थिक तथा प्रशासनिक कार्य गर्ने गरी ढकाललाई निमित्त प्रमुख प्रशासकीय अधिकृतको जिम्मेवारी दिइसकेको बताए । उक्त जिम्मेवारीसँगै कर्मचारी तथा शिक्षकलाई तलब खुवाउन, सामाजिक सुरक्षा भत्ता प्रदान गर्न तथा अन्य दैनिक कार्यको बाटो खुलेको उनले सुनाए ।

Bishwo Raj Dhakal1697214362.jpg