बाँकेको पशु प्रजनन कार्यालय गौघाटमा तीन वटा ‘मुर्रा’ राँगा पठाइयो

विशेष

Home
विशेष
बाँकेको पशु प्रजनन कार्यालय गौघाटमा तीन वटा ‘मुर्रा’ राँगा पठाइयो

बाँकेको पशु प्रजनन कार्यालय गौघाटमा तीन वटा ‘मुर्रा’ राँगा पठाइयो

नेपालगन्ज : भारतले उपहार स्वरुप दिएका मुर्रा राँगा सम्बन्धित ठाउँमा पठाउन सुरु गरिएको छ । प्रधानमन्त्री पुष्पकमल दाहालको भारत भ्रमणका क्रममा उपहार स्वरुप दिने भनिएका १५ वटा ‘मुर्रा’ राँगा बुधबार राती नेपालगन्ज ल्याइएको थियो ।

भारतको पञ्जावबाट राँगालाई स्थलमार्ग हुदै नेपालगन्जस्थित पशु क्वारेन्टाइन कार्यालयको होल्डिङ याडमा राखिएकोमा बिहीबार दिउँसोबाट सम्बन्धित ठाउँमा पठाउन सुरु गरिएको हो । पशु क्वारेन्टाइन कार्यालय नेपालगन्जका प्रमुख विनयकुमार कर्णले बिहीबार दिउँसो ३ वटा मुर्रा राँगा बाँकेको खजुरास्थित राष्ट्रिय पशु प्रजनन कार्यालय गौघाटमा पठाइएको जानकारी दिए ।

भिडियो हेर्नुस् :

यस्तै ७ वटा राँगा राष्ट्रिय पशु प्रजनन कार्यालय पोखरा र ५ वटा राँगा लहानस्थित राष्ट्रिय पशु प्रजनन कार्यालयमा पठाउने तयारी गरिएको बताए । ‘भारतबाट ल्याइएका सबै राँगाको बिहीबार दिउँसो स्वास्थ्य चेकजाँच गर्ने काम भयो, सबै राँगा स्वस्थ रहेको कुरा पशु चिकित्सकले प्रमाणित गरेपछि सम्बन्धित ठाउँमा पुर्याउन थालिएको हो,’ कर्णले भने ।

उन्नत जातका मुर्रा राँगालाई भारतको पञ्जाबस्थित राष्ट्रिय भैसी अनुसन्धान केन्द्रबाट ल्याइएको थियो । भारतबाट ल्याइएका राँगालाई बुझ्न पशु सेवा विभागका प्रमुख पशु विकास अधिकृत डा. माधवप्रसाद अर्याल नेपालगन्ज आएका थिए ।

Murra Rangaa_Photo 11700753123.jpg