नेपालगन्ज क्षेत्रमा दिनहुँ मोटरसाईकल र स्कुटर चोरी

समाज

Home
समाज
नेपालगन्ज क्षेत्रमा दिनहुँ मोटरसाईकल र स्कुटर चोरी

नेपालगन्ज क्षेत्रमा दिनहुँ मोटरसाईकल र स्कुटर चोरी आरोपी दुई जना बाँके प्रहरीको नियन्त्रणमा

चोरी गरेर मोटरसाईकलको रङ परिवर्तन गरी प्रयोग गरिरहेको अवस्थामा पक्राउ परेका अभियुक्त । तस्बिर सौजन्य : जिल्ला प्रहरी कार्यालय बाँके

नेपालगन्ज : नेपालगन्ज उपमहानगर क्षेत्रमा पछिल्लो समयमा मोटरसाईकल तथा स्कुटर चोरीका घटना बढेका छन् । उपमहानगर क्षेत्रमा दिनहुँजसो स्थानीय बासिन्दाका घर, पसल तथा कार्यालय अगाडी पार्किङ गरेर राखिएका मोटरसाईकल तथा स्कुटर चोरी हुने गरेको हो ।

दिनहुँ मोटरसाइकल तथा स्कुटर चोरी हुन थालेपछि नेपालगन्ज उपमहानगरबासी आतंकित भइरहेका छन् । पीडितले दिनहुँ जिल्ला प्रहरी कार्यालय बाँकेमा चोरीका घटना टिपाउने गरेका छन् । चोरी नियन्त्रणमा आउन नसकेपछि बाँके प्रहरीलाई यतिखेर टाउको दुखाई भइरहेको छ ।

श्रृंखलावद्ध रुपले चोरी भइरहँदा पनि प्रहरीले नियन्त्रण गर्न नसकेको भन्दै स्थानीय बासिन्दा असन्तुष्ट भएका छन् । चोरीका घटना भइरहँदा बाँके प्रहरीले दुई जनालाई नियन्त्रणमा लिएको छ । नेपालगन्ज उपमहानगरपालिका वडा नम्बर ८ बस्ने २३ वर्षका अजयसिंह बाडिया र वडा नम्बर ९ का २० वर्षीय रमेश भन्ने हरि सुनारलाई नियन्त्रणमा लिएको हो ।

जिल्ला प्रहरी कार्यालय बाँकेका प्रवक्ता एवम् प्रहरी नायव उपरीक्षक(डिएसपी) नारायण डाँगीका अनुसार नेपालगन्ज उपमहानगरपालिका वडा नम्बर ८ निवासी अहतर हुसेन फारुकीले आफ्नो मोटरसाईल चोरी भएको सूचना प्रहरीलाई दिएका थिए ।

उक्त मोटरसाईकल खोज्ने क्रममा बुधबार (मंसिर १३ गते) नेपालगन्ज उपमहानगरपालिका वडा नम्बर १८ स्थित जनता ग्यारेज अगाडीबाट चोरी गरेको मोटरसाईकलको रङ परिवर्तन गरी प्रयोग गरिरहेको अवस्थामा दुबै जनालाई प्रहरीले नियन्त्रणमा लिएको हो ।

अभियुक्त विरुद्ध आवश्यक अनुसन्धान सुरु गरिएको प्रवक्ता डाँगीले बताएका छन् । दुबै अभियुक्तलाई मुलुकी अपराध संहिता २०७४ को दफा २४२(२) बमोजिम २ वर्ष सम्म कैद र रु. ३० हजारसम्म जरिवाना हुन सक्ने प्रहरीले जनाएको छ ।

प्रकाशित मिति: बिहीबार, मंसिर १४, २०८० २०:०३

प्रतिक्रिया दिनुहोस्