बाँके (बैजनाथ) : बैजनाथ गाउँपालिकाको १४ औं गाउँसभा आइतबारबाट सञ्चालनमा आएको छ । गाउँपालिकाको कार्यालय रामपुरमा गाउँपालिका अध्यक्ष प्रकाशबहादुर शाहीको सभाध्यक्षतामा उक्त सभा सुरु भएको हो । गाउँपालिका उपाध्यक्ष निर्मला रोकायले सभाका सदस्यलाई स्वागत गरेकी थिइन् ।
गाउँपालिकालाई समृद्ध बनाउनका लागि सभाले विगतदेखी विभिन्न काम गर्दै आएको र आगामी दिनमा पनि सहकार्य, सद्भाव र एक रुपताका साथ अगाडी बढ्ने विश्वास गरिन् । सभाका विशिष्ट अतिथी राप्ती सोनारी गाउँपालिका अध्यक्ष तप्तबहादुर पौडेलले स्थानीय सरकार एक्लैले समस्यालाई समाधान गर्न सक्ने अवस्था नरहेको बताए । ‘अहिलेको अवस्थामा जनताका धेरै अपेक्षाहरु हामीसँग जोडिएका छन्, जनताका विभिन्न समस्यालाई सम्बोधन गर्नुपर्ने हामीसँग जिम्मेवारी छ,’ उनले भने ।
भिडियो रिपोर्ट हेर्नुस् :
१४ औं गाउँसभामा सभाका सदस्य एवम् बैजनाथ २ का वडाअध्यक्ष राजु रुचाल ठकुरी, वडा नम्बर ७ का वडाअध्यक्ष दिनेश थारु र वडा नम्बर ८ का वडाअध्यक्ष भगन थारुले समसामयिक विषयमाथी आफ्नो धारणा राखेका थिए ।
बैजनाथ २ का वडाअध्यक्ष एवम् सभाका सदस्य राजु रुचाल ठकुरीले गाउँपालिकाले आफ्ना गौरवका योजना ल्याउनुपर्ने सुझाव दिए । गाउँपालिकाको खेलकुद शाखाले आफै प्रतियोगिता सञ्चालन गर्नुभन्दा कुनै बिद्यालयलाई जिम्मेवारी दिएर अनुगमन गर्नुपर्ने बताए ।
यस्तै वडा नम्बर ७ का वडाअध्यक्ष एवम् सभाका सदस्य दिनेश थारुले जनप्रतिनिधि भएर जनताका समस्या नियालिरहेको र समृद्ध बैजनाथ बनाउन परिकल्पना गरिरहेको बताए । गाई भैसीको सुत्केरी भत्ता र स्वास्थ्य बीमाको सेवा सुविधा पुनः सञ्चालन गर्नुपर्ने सुझाव दिए । यसैगरी वडा नम्बर ८ का वडाअध्यक्ष एवम् सभाका सदस्य भगन थारुले जनप्रतिनिधि र कर्मचारी बीचको सम्बन्ध नङ र मासु जस्तो भनिएपनि कतिपय कर्मचारीको ब्यवहारका कारण काम गर्न अप्ठ्यारो हुने गरेको दुखेसो पोखे । ‘सरकारले नीति, नियम र कानुन बनाएको छ, नीति नियमका कारण समयमै काम सम्पन्न गर्न कठिन छ, नीति नियम परिवर्तन गरेर भएपनि समयमै काम सम्पन्न गरौं,’ उनले भने ।
सो क्रममा कार्यपालिका सदस्य एवम् विधान समितिकी संयोजक कृष्णा सुनारले गाउँपालिकाको व्यवसाय दर्ता ऐन २०७९ लाई संशोधन गर्न बनेको विधेयक २०८० प्रस्तुत गरेकी थिइन् । उक्त संशोधन विधेयकमाथी वडा नम्बर ४ का वडाअध्यक्ष एवम् सभाका सदस्य प्रेमबहादुर शाहीको टिप्पणीसहित सर्वसम्मत रुपमा पारित गरियो ।
यस्तै कार्यपालिका सदस्य एवम् सामाजिक विकास समिति संयोजक भुमिसरा रानाले विषयगत समितिहरुको प्रतिवेदन प्रस्तुत गरेकी थिइन् । सभाध्यक्ष शाहीले १४ औं गाउँ सभामा उठेका समग्र विषय बस्तुलाई प्रष्ट्याएका थिए । उनले बैजनाथलाई समृद्ध बनाउन थुप्रै कामहरु गरिएको बताए ।
बैजनाथको भौतिक पुर्वाधार विकास, कृषि, शिक्षा, स्वास्थ्य, पर्यटन, भूमिहिन सुकुम्बासी लगायत क्षेत्रमा काम गरिएको प्रष्ट्याए । सभाको अर्को बैठक आगामी माघ ५ गते पुनः बस्ने गरी स्थगित भएको प्रमुख प्रशासकीय अधिकृत राजेशकुमार यादवले जानकारी दिए ।
