नेपालगन्ज : सडकमा जथाभावी फोहोर फाल्नेमाथी कानुनी रुपमा कडाई गर्न थालिएको छ । सर्बसाधारण तथा ब्यापारीलाई सुरुमा सम्झाई बुझाई गरेको नेपालगन्ज उपमहानगरपालिकाले अहिले कारबाही नै गर्न थालेको छ ।
पटक-पटकको आग्रहलाई बेवास्ता गर्दै सडकमा फोहोर फाल्ने क्रम नरोकिएपछि उपमहानगरपालिकाले कारबाही स्वरुप जरिवाना असुल गरेको हो । स्थलगत अनुगमनका क्रममा जथाभावी फोहोर फाल्नेमाथी कारबाही गरिएको छ । उपमहानगर क्षेत्रका आधा दर्जन बढी व्यापारिक फर्म, बैंक तथा पसललाई जरिवाना गरिएको नेपालगन्ज उपमहानगरपालिकाले जनाएको छ ।
नेपालगन्जमा आइतबार साँझ ग्लोबल आइएमई बैंक, राही मार्ट, शर्मा प्लास्टिक, ए टु जेड मोबाईल पसल, रोयल कर्णाली मार्ट, राहुल मःम सेन्टर र मयुरिया रेस्टुरेन्ट एण्ड बारले सडकमा जथाभावी फोहोर फालेको भेटिएपछि नेपालगन्ज उपमहानगरपालिकाको फोहोरमैला व्यवस्थापन ऐन २०७५ बमोजिम जनही ५ हजार तथा पुष्पा इलेक्ट्रिकल्स सप्लायर्सलाई सडकमा २४ घण्टाभन्दा बढी समयदेखि निर्माण सामाग्री राखे वापत ५ हजार रुपैयाँ जरिवाना गरिएको छ ।
नगर प्रमुख प्रशान्त बिष्ट, नगर प्रहरी, नेपालगन्ज उद्योग बाणिज्य संघ, नागरिक समाज, होटेल व्यवसायी संघ लगायत सर्वपक्षिय टोलीले धम्बोझी चोकदेखि प्रहरी गुल्मसम्म सडकको दायाँबायाँ क्षेत्रमा अनुगमन तथा निरीक्षण गरेको थियो । सो क्रममा सडकमा फोहोर फाल्ने र लामो समयसम्म निर्माण सामग्री सडकमै थुपार्नेलाई जरिवाना गरियो ।
अनुगमन टोलीमा नगर प्रहरी प्रमुख सूर्य बोगटी, नेपालगन्ज उद्योग बाणिज्य संघका महासचिव भिम रानाभाट,संघका पूर्वअध्यक्ष कृष्णप्रसाद श्रेष्ठ, होटल व्यवसायी गोपाल गिरी, व्यवसायी धु्रब दाहाल लगायत सहभागी भएका थिए । नेपालगन्ज उपमहानगरपालिकाको फोहोरमैला व्यवस्थापन ऐन २०७५ अनुसार ५ हजार रुपैयाँदेखि ५० हजार रुपैयाँसम्म जरिवाना गर्न सकिन्छ ।
नगर प्रमुख विष्टले नगर सफा राख्नु सबै नगरबासीको दायित्व भएको भन्दै जथाभावी फोहोर नफाल्न आग्रह गरे । बिष्टले अब हरेक दिन साँझ नगरमा अनुगमन गरिने बताए । फोहोरमैला व्यवस्थापनका लागि नागरिक तहमा जागरण ल्याउन यसअघि उपमहानगरपालिकाले सचेतना प्रवद्र्धन अभियान चलाएको थियो ।
