नेपालगन्ज : नेपालगन्जको ‘आईसिपी’ हस्तान्तरण भएको छ । उद्घाटन भएको झण्डै एक वर्षपछि भारतले नेपाल सरकारलाई हस्तान्तरण गरेको हो । नेपाल र भारत सरकारबीच सम्झौता भएको डेढ दशकपछि नेपालगन्ज नाकामा आईसिपी निर्माण गरिएको थियो ।
उक्त आईसिपीको २०८० जेठमा भारत भ्रमण गएका बेला प्रधानमन्त्री पुष्पकमल दाहाल र भारतीय प्रधानमन्त्री नरेन्द्र मोदीले ‘भर्चुअल’ माध्यमबाट उद्घाटन गरेका थिए । भारत सरकारका तर्फबाट परामर्शदाता कम्पनी ‘राईट्स’ले आइतबार बेलुका नेपाल सरकार शहरी विकास मन्त्रालय तथा नेपाल इन्टर मोडल यातायात विकास समितिलाई आईसिपी हस्तान्तरण गरेको हो ।
सो क्रममा भारतका तर्फबाट दुतावास सहित सम्बन्धित सरोकारवाला अधिकारी तथा नेपालका तर्फबाट मन्त्रालय, विभाग तथा समितिका कार्यकारी निर्देशक आशिष गजुरेल लगायत उच्च अधिकारीको उपस्थिती रहेको थियो । कार्यकारी निर्देशक गजुरेलले भारत सरकारको सहयोगमा निर्मित एकिकृत जाँच चौकी(आईसिपी) निर्माण सम्पन्न भएर पनि हस्तान्तरण भईसकेको बताए ।
‘भारतले आफ्नो क्षेत्रतिर पनि आईसिपी बनाएको छ, नेपालतर्फ बनेको आईसिपी हामीलाई हस्तान्तरण भएर आइसकेको छ,’ उनले भने ‘आईसिपी सञ्चालन गर्नका लागि निजी क्षेत्रलाई पनि हामीले प्रतिस्पर्धात्मक प्रणालीद्धारा छनोट गरिसकेका छौं ।’ नेपालगन्ज उपमहानगरपालिका वडा नम्बर १६ जयसपुरमा आईसिपीका ठुला पुर्वाधार निर्माण भएपनि पछिल्लो केही महिनादेखी नेटवर्किङ, सिसि क्यामेरा जडान लगायत काम अधुरै थियो ।
आईसिपी निर्माणका लागि भारतको ‘राजदिप कन्स्ट्रक्सन कम्पनी’ ले १ अर्ब ४७ करोड (भारु) मा ठेक्का पाएको थियो । सन् २०२० नोभेम्बर २५ देखि निर्माण सुरु भएकोमा उक्त कम्पनीले दुई वर्षभित्रमा सबै काम सम्पन्न गर्ने समय पाएको थियो । ठेकेदार कम्पनीले दुई पटकसम्म म्याद थपेको थियो । आईसिपी निर्माणमा भारतीय परामर्शदाता कम्पनी ‘राईट्स’ले जिम्मा पाएको थियो । भारत सरकारले यसअघि सन् २००५ मा नेपालको बिराटनगर, बीरगन्ज, नेपालगन्ज र भैरहवा नाकामा आईसिपी निर्माण गरिदिने सहमती जनाएको थियो ।
भारतकै सहयोगमा नेपालगन्ज नाकामा आईसिपी निर्माण गर्न २०६७ सालमा नेपाल सरकारले जयसपुरमा जग्गा अधिग्रहण गरेको थियो । नेपाल सरकारले अधिग्रहण गरेर राखेको ८७ विघा जग्गामा आईसिपी निर्माण गरिएको छ । आईसिपी स्थलमा भन्सार कार्यालय, पशु र प्लान्ट क्वारेन्टाइन, गोदाम, खाद्य प्रबिधी तथा गुण नियन्त्रण, सुरक्षा ब्यारेक, बैंक काउण्टर लगायत कार्यालय रहने गरी संरचना निर्माण गरिएको छ ।
आईसिपी सञ्चालनमा आएपछि मालबाहक सवारी साधनको जाँचपास सोही ठाउँबाट गरिने भन्सार कार्यालयका कर्मचारी बताउँछन् । नेपालगन्ज भन्सार कार्यालयका प्रमुख भन्सार अधिकृत धु्रवराज विश्वकर्माले कार्यालयको काम अब आईसिपीबाटै सञ्चालन गर्ने तयारी भइरहेको बताए । उनका अनुसार हस्तान्तरण भईसकेपछि अब भन्सार कार्यालयले यही बैशाख २५ गतेबाट आफ्नो काम आईसिपी स्थलबाट सुरु गर्नेछ ।
