नेपालगन्ज : भिषण हावाहुरी र वर्षाका कारण अवरुद्ध भएको बिद्युत सेवा सुचारु गर्न नेपाल विद्युत प्राधिकरण असफल भएको छ । अस्पताल, सरकारी कार्यालय, अक्सिजन प्लान्ट लगायत निकाय रहेको नेपालगन्जको सबैभन्दा संवेदनशिल मानिने बोर्डर, परस्पुर फिडरमा विगत ४० घण्टादेखि विद्युत सेवा अवरुद्ध भएको हो ।
हावाहुरी र वर्षाका कारण सोमबार बेलुका साढे ५ बजेदेखि नेपालगन्जसहित बाँके जिल्लाभर विद्युत सेवा बन्द भएको थियो । नेपालगन्जका अधिकांस क्षेत्रमा प्राधिकरणले सेवा सुचारु गरेपनि बोर्डर, परस्पुर, राप्तीपारी लगायतका केही फिडरमा बुधबार बिहान १० बजे (यो समाचार तयार पार्दा) सम्म पनि लाईन सुचारु भएको छैन ।
विद्युत सेवा सुचारु नहुँदा विगत ४० घण्टादेखि सर्वसाधारण नागरिकले चर्को गर्मीमा निकै सास्ती खेपेका छन । '४० घण्टादेखि बत्ती छैन, ट्यांकी र धारामा पानी छैन, पंखा, कुलर चलाउन नपाउँदा गर्मीले तड्पी रहेका छौं,' नेपालगन्ज भृकुटीनगरकी मनिषा ओलीले भनिन ।
विद्युत नहुँदा अस्पतालमा बिरामीहरुको पनि विचल्ली भएको छ । कतिपय अस्पतालले जेनेरेटर चलाएपनि राम्रोसँग उपकरण चल्न सकेका छैनन । अस्पतालका आईसियु, एनआईसियु, अपरेशन कक्षमा समस्या देखिन थालेको बताइएको छ । यस्तै प्राधिकरणले राप्तीपारीको फिडरमा पनि विद्युत सप्लाई बन्द गरेको छ । उपमहानगरको फुलटेक्रा, पुरैना, पुरैनी क्षेत्रमा पनि ४० घण्टादेखि विद्युत सेवा बन्द रहेको स्थानीयले बताएका छन । केन्द्रले नेपालगन्जको गर्मीलाई मध्यनजर गर्दै छिटो सेवा सुचारु गर्न प्राविधिक जनशक्तिलाई सही तरिकाले परिचालन गर्न नसकेको बताइन्छ ।
प्राधिकरण नेपालगन्ज वितरण केन्द्रले प्रायः जसो सबै स्थानमा स्थानमा वितरण तथा प्रशारण लाइनको पोल र तारमा क्षति पुग्न जादाँ बिद्युत सेवा अवरुद्ध भएको कुरा सोमबार साँझ सामाजिक संजालमार्फत प्रष्ट्याएपनि बुधबार बिहानसम्म पनि सेवा सुचारु गर्न के, कति कारणले सकेन, त्यसबारे बताउन चाहेको छैन । यसबारे उपभोक्ताले जानकारी लिन खोज्दा प्राधिकरण नेपालगन्ज वितरण केन्द्र जिम्मेवारीबाट पन्छिने गरेको छ ।
केन्द्रका प्रमुख मोबाईल अफ गरेर बसेका छन । केन्द्रले सही सूचना नदिएर गैर जिम्मेवार बनेपछि उपभोक्ता आक्रोशित भएका छन । विद्युतको गैर जिम्मेवारी कामको प्रतिवाद गर्न राप्तीपारीबाट जनप्रतिनिधीसहित सर्वसाधारणहरु विद्युत कार्यालय घेराउ गर्न आउन लागेका छन । राप्ती सोनारी गाउँपालिका उपाध्यक्ष मनिषासिंह थारुले ४० घण्टादेखि विद्युत सुचारु नभएपछि विद्युत कार्यालय नेपालगन्जमा आउन लागेको बताइन ।
