नेपालगन्ज : लुम्बिनी प्राविधिक विश्व विद्यालयले शैक्षिक सत्र २०८२ का लागि स्नातक तहमा नयाँ भर्ना प्रक्रिया सुरु गरेको छ । विश्व विद्यालयले शुक्रबार पत्रकार सम्मेलन गरेर यसबारे जानकारी दिएको हो । विश्व विद्यालयले पछिल्लो समयमा क्रमिक रुपमा स्नातक र स्नातककोत्तर तहमा कार्यक्रम थप्दै गएको छ ।
विश्वविद्यालयले इन्जिनियरिङ तथा सूचना प्रविधि अध्ययन संस्थान अन्र्तगत स्नातक तहमा बिटेक इन सिभिल इन्जिनियरिङ, बिटेक इन आइटी इन्जिनियरिङ, बिटेक इन सिएस एण्ड एआई र बिटेक इन आईटी कार्यक्रममा नयाँ भर्ना प्रक्रिया सुरु गरिएको डिन डा. निरज केसीले जानकारी दिए ।
उनका अनुसार उक्त कार्यक्रममा दोस्रो र तेस्रो ब्याचका विद्यार्थीलाई भर्ना प्रक्रिया अगाडी बढाइएको हो । विश्व विद्यालयले यसअघि पनि स्नातक तहमा बिटेक इन आईटी, बिटेक इन कम्प्युटर साइन्स एण्ड एआई, बिटेक इन आइटी इन्जिनियरिङ र बिटेक इन सिभिल इन्जिनियरिङको पढाई सञ्चालनमा ल्याएको थियो ।
यस्तै इन्जिनियरिङ तथा सूचना प्रविधि अध्ययन संस्थान अन्र्तगत स्नातककोत्तर तहमा एमटेक इन कम्प्युटर साइन्स र एमटेक इन आइटीमा पनि विश्व विद्यालयले अध्यापन सुरु गरिसकेको छ । केहीदिन अघि स्नातककोत्तर तहका बिद्यार्थीलाई अभिमुखीकरण गरिएको थियो ।
डिन डा. केसीका अनुसार विश्व विद्यालयले गुणस्तरीय र उद्योगमैत्री पाठ्यक्रम, ६० प्रतिशत आन्तरिक मूल्यांकन प्रणाली, एक महिनाभित्र नतिजा प्रकाशन, र ग्रेड बृद्धि पुनःपरीक्षाको व्यवस्था गरेको छ । स्नातक तहमा नयाँ भर्नाका लागि आवेदन फाराम यही साउन ११ गतेदेखि विश्वविद्यालयको अनलाईन वेबसाइटमार्फत उपलब्ध हुने डिन केसीले जानकारी दिए । ‘कक्षा १२ को नतिजाको प्रतिक्षामा रहेका बिद्यार्थी भाई बहिनीहरुले प्रवेश परिक्षा दिन पाउनु हुनेछ,’ उनले भने ।
विश्व विद्यालयका रजिष्ट्रार (कुल सचिव) रेगबहादुर भण्डारीले आर्थिक रूपमा कमजोर, जेहेन्दार तथा विशेष समुदायका विद्यार्थीलाई लक्षित गरेर छात्रवृत्ति दिइएको बताए । उनका अनुसार ६ जनालाई पूर्ण छात्रवृत्ति, ३६ जनालाई ७५ प्रतिशत छात्रबृत्ति, २८ जनालाई ५० प्रतिशत छात्रबृत्ति र अधिकांस बिद्यार्थीलाई २५ प्रतिशत छात्रबृत्ति दिइने ब्यवस्था मिलाइएको छ । स्वदेशमै गुणस्तरिय प्राविधिक शिक्षा हासिल गर्न पाइने भएकाले लुम्बिनी प्राविधिक विश्व विद्यालयप्रति बिद्यार्थीको आर्कषण बढ्दै गएको छ ।
