त्रिवि सेवा आयोगको निर्णयविरुद्ध विद्यार्थी आमरण अनशनमा

प्रविधी

Home
प्रविधी
त्रिवि सेवा आयोगको निर्णयविरुद्ध विद्यार्थी आमरण अनशनमा

त्रिवि सेवा आयोगको निर्णयविरुद्ध विद्यार्थी आमरण अनशनमा

काठमाडौं : कम्प्युटर विज्ञान पदको परीक्षा स्थगितको माग गर्दै त्रिभुवन विश्वविद्यालयको उपकुलपति कार्यालय अगाडि मंगलबारदेखि आमरण अनशन सुरु गरिएको छ । यसअघि अयोग्य ठहरिएका उम्मेदवारको नाम पुनः स्वीकृत गरी परीक्षा सञ्चालन गर्न लागिएको भन्दै विद्यार्थी एसोसियन कम्प्युटर साइन्सका सचिव केशव बानियाँ अनिश्चितकालीन आमरण अनशनमा बसेका हुन् । उनको अनशनप्रति अन्य विद्यार्थीहरूले समेत ऐक्यबद्धता जनाएका छन् ।

विद्यार्थीहरूको निरन्तर विरोधका बाबजुद मंगलबार कम्प्युटर विज्ञान पदको प्रथम पत्रको परीक्षा सम्पन्न भइसकेको छ भने दोस्रो पत्रको परीक्षा आगामी शुक्रबार पुष १८ गतेका लागि तोकिएको छ । तर विद्यार्थीहरूले भने प्रक्रिया नै त्रुटिपूर्ण भएको दाबी गर्दै परीक्षा तत्काल स्थगित गर्नुपर्ने अडान कायमै राखेका छन् ।

उम्मेदवारी दरखास्त स्वीकृत भएका सबै उम्मेदवारको शैक्षिक योग्यता विषय समितिको निर्णयअनुसार पुनः जाँच गरी अन्तिम नामावली सार्वजनिक गर्नुपर्ने र त्यसपछि मात्र परीक्षा मिति तोकिनुपर्ने उनीहरूको मुख्य माग छ । यही मागसहित पुष १ गतेदेखि कम्प्युटर साइन्स एलुम्नाइ र विद्यार्थी एसोसियन कम्प्युटर साइन्सका विद्यार्थीहरूले तालाबन्दी र विरोधका विभिन्न कार्यक्रम गर्दै आएका छन् ।

यसक्रममा उनीहरूले त्रिवि सेवा आयोग तथा विज्ञान तथा प्रविधि अध्ययन संस्थानमा समेत तालाबन्दी गरिसकेका छन् । विद्यार्थीहरूले विगतमा अयोग्य ठहरिएका उम्मेदवार अहिले कसरी योग्य घोषित भए भन्ने प्रश्न उठाउँदै प्रत्येक पटक विज्ञापन हुँदा त्रिभुवन विश्वविद्यालय सेवा आयोगमा अनियमितता किन दोहोरिन्छ भन्ने विषयमा गम्भीर आपत्ति जनाउँदै आएका छन् ।

सेवा आयोगद्वारा कम्प्युटर विज्ञान पदका लागि प्रकाशित हालको विज्ञापन नम्बर ११८५-२०८१/८२ अन्तर्गत, यसअघि अयोग्य ठहर भई नामावलीबाट हटाइएका तथा विषय र योग्यता नमिल्ने उम्मेदवारहरूलाई पुनः योग्य ठहर गरी थप नामावलीमार्फत सार्वजनिक गरिएको विषयप्रति आफूहरूको गम्भीर आपत्ति रहेको आमरण अनशनमा रहेका बानियाँले बताएका छन् ।

प्रकाशित मिति: मंगलबार, पुस १५, २०८२ २२:२४

प्रतिक्रिया दिनुहोस्