नेपालगन्ज : नेपाली कांग्रेसका पुराना नेताको रुपमा परिचित ब्यक्ति हुन्, युवराज शर्मा । यिनै शर्मा बुधबार राष्ट्रिय सभा सदस्यमा निर्वाचित भएका छन् । दाङमा बुधबार सम्पन्न निर्वाचनमा लुम्बिनी प्रदेशबाट सत्तारुढ पाँच दलिय गठबन्धनका तर्फबाट उनी निर्वाचित भएका हुन् ।
निर्वाचित भएपछि प्रतिक्रिया दिदै उनले सम्बैधानिक र पार्टीप्रतिको दुबै दायित्व र कर्तब्य पुरा गर्ने बताएका छन् । ‘मेरो कुरा प्रष्ट नै छ, अब मैले सम्बैधानिक र पार्टीले मलाई दिएको जिम्मेवारी अनुसार पार्टीप्रतिको दायित्व र कर्तब्य पुरा गर्नेछु,’ शर्माले भने । ७१ वर्षीय शर्माले पार्टी राजनीतिमा करिव पाँच दशक बिताइसकेका छन् ।
शर्मा २०४५ देखी २०४९ सालसम्म कांग्रेस बाँकेको सभापति भएर काम गरेका थिए । पार्टीमा योगदान धेरै भएपनि विगतदेखी हरेक अवसरबाट उनी बञ्चित हुँदै आएका थिए । पञ्चायत विरोधी गतिविधी गरेका कारण शर्मा २०२४ सालमा पहिलो पटक जेल परेका थिए । २०२४ सालपछि पटक-पटक गरेर आफु ३/४ वर्षजति जेल बसेको उनी सम्झिन्छन् ।
२०२५ सालमा विपी कोइरालासँग भारतको गोरखपुरमा उनको पहिलो पटक भेट भएको थियो । विपी कोइरालासँग बाक्लो भेटघाट हुन थालेपछि उनकै विचारबाट धेरै प्रभावित भएर कांग्रेसको राजनीतिमा लागेका हुन् । उनी सुरुमा पढाईको शिलशिला भारतको बनारशमा गएका थिए । त्यहाँ विपी कोइरालाका विचार सुनेर प्रभावित भई नेपाल बिद्यार्थी संघ र कांगे्रेसको राजनीतिमा लागे ।
२०२७ सालमा भारतको बनारशबाट प्रतिनिधी भएर नेपाल बिद्यार्थी संघको काठमाडौं महाधिवेशनमा सहभागी भएका थिए । २०२८ सालमा शेरबहादुर देउवा नेपाल विद्यार्थी संघको केन्द्रिय अध्यक्ष हुँदा शर्मा उपाध्यक्ष थिए । राजनीतिसँगै केहीवर्ष शिक्षण पेशामा समेत संलग्न रहेका उनी नेपाल शिक्षक संगठनको राष्ट्रिय महासचिव समेत भएका थिए ।
२०३३ सालमा तत्कालिन महामन्त्री गिरिजाप्रसाद कोइरालाले रणेन्द्रबहादुर हमाल (भाईराजा) लाई कांग्रेस बाँकेको जिल्ला सभापति बनाएका थिए । त्यसबेला यिनै शर्मा कांग्रेस बाँकेको जिल्ला सचिव र सुशिल कोइराला जिल्ला कार्यसमिति सदस्य थिए । ‘गिरिजा बाबुले सुशिल जीलाई जिल्ला कार्यसमिति सदस्यमा राखिदिनुपर्यो भन्नुभयो, रणेन्द्रबहादुर हमाल सभापति, म सचिव र सुशिल दाई चाही जिल्ला कार्यसमितिको सदस्य हुनुहुन्थ्यो,’ शर्माले विगतलाई स्मरण गर्दै भने ‘हामीले नै सुशिल जीलाई स्थापित गरेका हौं ।’
कोइरालासँग सुरुमा शर्माको राम्रै सम्बन्ध थियो । २०४८ सालपछि भने कोइरालासँग बैचारिक द्धन्द्ध सुरु भयो । कोइराला राजनीतिमा अगाडी बढ्दै गए । तर, शर्माले पार्टीको जिल्ला सभापति बाहेक अरु कुनैपनि पाएनन् । कोइराला र शर्माबीच द्धन्द्ध यसरी बढ्यो कि उनलाई हरेक अवसरबाट बञ्चित गराइयो ।
कोइरालाले शर्माको ठाउँमा अन्य नेतालाई अगाडी सारेर सांसद बनाए । शर्माले भने सांसदको टिकट कहिल्यै पाएनन् । पार्टीले टिकट नदिएपछि उनी २०५१ सालमा क्षेत्र नम्बर १ र २ बाट स्वतन्त्र उम्मेदवार समेत बनेका थिए । कोइरालासँग शर्मा कहिल्यै झुकेनन् र कोइरालाले पनि उनलाई हरेक अवसरबाट बञ्चित गरिरहे ।
‘सुशिल जीसँग मेरो वैचारिक द्धन्द्ध भयो, उहाँसँग मेरो विवाद भएपछि गिरिजा बाबुले पनि मलाई रुचाउनु भएन, विगतमा मलाई हरेक अवसरबाट बञ्चित गराइयो, अहिले मलाई पार्टीले जुन हिसाबले मुल्यांकन गरेको छ, यसप्रति म धेरै नै आभारी छु,’ उनी भन्छन् ।
नेपालगन्ज निवासी शर्माले बाँकेको क्षेत्र नम्बर ३ बाट पार्टीको राजनीति गर्दै आएका छन् । कांग्रेसको १४ औं महाधिवेशनमा क्षेत्र नम्बर ३ बाँकेबाट महाधिवेशन प्रतिनिधीमा शर्मा निर्विरोध निर्वाचित भएका हुन् ।
सम्बन्धित समाचार पढ्नुस् :
राष्ट्रिय सभामा लुम्बिनी प्रदेशबाट सत्तारुढ गठबन्धनका उम्मेदवार निर्वाचित
‘विपीको ब्यक्तित्व र विचारबाट प्रभावित भई कांग्रेसको निष्ठावान कार्यकर्ता बनेको हुँ’- (भिडियो संवाद)
राष्ट्रियसभा निर्वाचनको टिकट पाउने शर्माको यस्तो छ राजनीतिक उतार-चढाप
कांग्रेसले राष्ट्रियसभा सदस्यका उम्मेदवार टुंग्यायो, लुम्बिनीबाट युवराज शर्मा
राष्ट्रिय सभा निर्वाचनमा बाँके कांग्रेसले गर्यो चार जनालाई सिफारिस
